ចូលឆ្នាំខ្មែរ និងថៃ ខុសគ្នាទាំងពេលរៀបចំ និងចំនួនថ្ងៃឈប់សម្រាក

2018-03-20 02:27:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើប្រៀបធៀបចំនួនថ្ងៃឈប់សម្រាកនៅអំឡុងពិធីបុណ្យចូលឆ្នាំប្រពៃណីនាពេលខាងមុខ ប្រទេសថៃនឹងមានថ្ងៃឈប់សម្រាកលើសកម្ពុជាចំនួន ១ថ្ងៃ។

យោងតាមសេចក្ដីប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈ កម្ពុជានឹងមានការឈប់សម្រាកចំនួន ៤ថ្ងៃ អំឡុងពេលចូលឆ្នាំប្រពៃណីខ្មែរខាងមុខ គឺរាប់ចាប់ពីថ្ងៃទី១៤ ដល់ថ្ងៃទី១៧ ខែមេសា ឆ្នាំ២០១៨។ ចំណែកឯ ការឈប់សម្រាកនៅប្រទេសថៃវិញ មានរយៈពេលដល់ទៅ៥ថ្ងៃឯណោះ គឺចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០១៨។

សកម្មភាពចូលឆ្នាំនៅថៃ

សូមបញ្ជាក់ថា ដើមឡើយថ្ងៃឈប់ពិធីបុណ្យចូលឆ្នាំថ្មី មានរយៈពេលតែ ៣ថ្ងៃប៉ុណ្ណោះ នៅក្នុងប្រទេសទាំង២ តែដោយសារថ្ងៃឈប់ប៉ះចំថ្ងៃអាទិត្យទើបត្រូវលើក១ថ្ងៃបន្ថែមទៀត។ កម្ពុជាត្រូវចូលឆ្នាំថ្មី ចាប់ពីថ្ងៃទី១៤ ដល់ថ្ងៃទី១៦ តែថែម១ថ្ងៃទៀត (១៧មេសា) ជំនួសឲ្យថ្ងៃអាទិត្យទី១៥។ ដោយឡែក ថ្ងៃចូលឆ្នាំនៅថៃ គឺចាប់ពីថ្ងៃទី១៣ ដល់ថ្ងៃទី១៥ ខែមេសា ដោយក្នុងនោះប៉ះចំថ្ងៃអាទិត្យ១ថ្ងៃទើបលើកដល់ថ្ងៃទី១៦មេសា។ ក្នុងលក្ខខណ្ឌពិសេសមួយ គណៈរដ្ឋមន្ត្រីថៃបានសម្រេចអនុញ្ញាតឲ្យឈប់១ថ្ងៃទៀតគឺនៅថ្ងៃទី១២មេសា ក្រោមហេតុផលថា ដើម្បីធ្វើឲ្យពលរដ្ឋមានពេលច្រើនទៅលេងស្រុកកំណើត និងជំរុញឲ្យមានកំណើនការធ្វើដំណើរកម្សាន្តនៅក្នុងស្រុក៕