ពាក្យ​ចចាមអារ៉ាម​ថ្មី​មួយ​ទៀត​កំពុង​តែ​បង្ហោះ​ពេញ​ព្រោងព្រាត​លើ​បណ្ដាញ​សង្គម​ហ្វេសប៊ុក គឺ​ពាក្យ​ថា "BFF"។ សារ​ដែល​ចែកចាយ​ត​គ្នា​បញ្ជាក់​ថា បើ​អ្នក​ប្រើប្រាស់​ហ្វេសប៊ុក Comment ពាក្យ "BFF" ហើយ​ចេញ​ពណ៌​បៃតង​នោះ បង្ហាញ​ថា គណនី​របស់​អ្នក​មាន​សុវត្ថិភាព តែ​បើ​មិន​ចេញ​ពណ៌​បៃតង​ទេ គណនី​នឹង​ងាយ​ត្រូវ​គេ​លួច (Hack) យក។ ប៉ុន្តែ​​វា​មិន​មែន​ជា​រឿង​ពិត​​ឡើយ។

ជា​ធម្មតា នៅ​ពេល​អ្នក​​វាយ​អក្សរ​ថា "BFF" លើ​ហ្វេសប៊ុក អក្សរ​នោះ​នឹង​ចេញ​ជា​ពណ៌​បៃតង។ យ៉ាង​ណា​មិញ នេះ​មិន​បាន​បញ្ជាក់​ថា គណនី​របស់​អ្នក​មាន​សុវត្ថិភាព ឬ​ត្រូវ​គេ​ងាយ​លួច​យក​នោះ​ទេ។ និយាយ​ឲ្យ​ចំ​ទៅ​​ពាក្យ​ចចាមអារ៉ាម​នេះ​គឺ​ជា​ការ​បោកប្រាស់​របស់​គេ​តែ​ប៉ុណ្ណោះ។

"BFF" ជា​ពាក្យ​ពិសេស​មួយ ដែល​ហ្វេសប៊ុក​ជ្រើសរើស​បង្កើត​ឲ្យ​មាន​លក្ខណៈ​ខុស​ប្លែក​ពី​គេ​តែ​ប៉ុណ្ណោះ។ ជា​ឧទាហរណ៍ ក្រៅ​ពី "BFF" ហ្វេសប៊ុក​ក៏​រើស​យក​ពាក្យ​ពិសេស​មួយ​ចំនួន​ឲ្យ​មាន​លក្ខណៈ​ខុស​ប្លែក​ពី​គេ​ផង​ដែរ​ដូចជា “Congrats”, “you’re the best”, “best wishes”, “you got this” និង “xoxo” ជា​ដើម។ ពាក្យ​ទាំង​នេះ​មិន​បញ្ជាក់ ឬ​តំណាង​អំពី​សុវត្ថិភាព​របស់​គណនី​ហ្វេសប៊ុក​ឡើយ។

យោង​តាម​ការ​កត់​សម្គាល់​របស់ Kley Kley ការ​បង្កើត​មាន​ពាក្យ​ចចាមអារ៉ាម​ពី​នេះ​ពី​នោះ​​លើ​ហ្វេសប៊ុក ជា​ទូទៅ​គឺ​ដើម្បី​តែ​ទាក់ទាញ​ការ Share និង Like ប៉ុណ្ណោះ។ អ្នក​ដែល​បង្កើត​វា​ឡើង​ភាគ​ច្រើន​គឺ​ជា​អ្នក​រក​លុយ​តាម​អនឡាញ ហើយ​វិធីសាស្ត្រ​នេះ​គឺ​ទាញ​យក Like Page ឲ្យ​ច្រើន ហើយ​ឆាប់​ល្បី​មាន​ស្គាល់ និង​ចូល​មើល។ កន្លង​មក មាន​ការ​បោកប្រាស់​ទាញ​យក Like Page តាម​វិធី​ច្រើន ដូចជា ការ​បង្ហោះ​ថា​រើស​លុយ​បាន​ហើយ​ប្រកាស​ឲ្យ​ជួយ Share ដើម្បី​ស្វែង​រក​ម្ចាស់ ឬ​ការ​បង្ហោះ​រូប​ប្លែក ហើយ​ឲ្យ​គេ Comment “168” នាំ​លាភ​សំណាង​ជា​ដើម៕