ថៃផ្ទុះកំហឹងនឹងនារីវ័យក្មេងម្នាក់ ដែលលើកជើង និងដាក់គូទអង្គុយលើកន្លែងស័ក្ដិសិទ្ធិ

2018-03-22 07:26:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ត្រីជាជនបរទេសម្នាក់ បានក្លាយជាប្រធានបទក្ដៅគគុកជាថ្មីទៀតហើយ នៅក្នុងប្រទេសថៃ ដោយសារកាយវិការមិនសមរម្យរបស់នាងនៅទីកន្លែងស័ក្ដិសិទ្ធិមួយកន្លែង។

បើតាមរូបដែលបង្ហោះលើបណ្ដាញសង្គមកាលពីថ្ងៃទី២១មីនា ស្ត្រីមិនស្គាល់អត្តសញ្ញាណរូបនេះបានលើកជើង និងដាក់គូទអង្គុយលើរបារមួយកន្លែងនៅក្នុងវត្តព្រះកែវ ដែលជាទីហាមឃាត់មិនឲ្យប្រព្រឹត្តទង្វើយ៉ាងដូច្នេះឡើយ។ ក្នុងរូប គេសង្កេតឃើញនាងឡើងអង្គុយនៅទីនោះ គឺដើម្បីឲ្យមិត្តភ័ក្ដិថតរូបតាមទូរសព្ទ។

រូបភាពរបស់នារីបរទេសខាងលើ ត្រូវបានបង្ហោះដោយគណនីមួយឈ្មោះ Aditha But Adit តែឥឡូវត្រូវបានលុបចោលវិញបាត់ទៅហើយ។ ទោះជាលុបពីគណនីក៏ដោយ រូបនោះត្រូវគេយកទៅបង្ហោះតព្រោងព្រាតលើបណ្ដាញសង្គម ហើយបង្កជាមតិរិះគន់យ៉ាងច្រើនសន្ធឹក។ នៅក្នុងការបង្ហោះដើម ម្ចាស់រូបបានសរសេរថា៖ "ខណៈខ្ញុំកំពុងព្យាយាមគេចចេញពីក្រុមទេសចរជនជាតិចិន ដើម្បីបួងសួងនៅវត្តព្រះកែវ ភ្នែករបស់ខ្ញុំស្ទើរតែលានចេញមកក្រៅហើយពេលឃើញអ្នកស្រីម្នាក់នេះអង្គុយថតរូបយ៉ាងដូច្នេះ។ ខ្ញុំបម្រុងទៅនឹងព្រមាននាងដែរ តែនាងបានដើរចេញទៅបាត់។ វាមិនសមរម្យទាល់តែសោះ។ ត្បិតនាងពុំបានឃើញសញ្ញាព្រមានក៏ដោយ ក៏នាងមិនគួរហ៊ានឡើងអង្គុយលើកន្លែងស័ក្ដិសិទ្ធិនេះទេ"។

គួររំលឹកថា ធ្លាប់មានករណីស្រដៀងគ្នានេះដែរកាលពីពេលកន្លងមក ដោយមានបុរស២នាក់បានស្រាតខោថតចេញគូទ នៅវត្តអារុណ ប្រទេសថៃ។ ទេសចរបរទេសទាំង២នាក់ត្រូវបានថៃចាប់ដាក់គុកអស់រយៈពេល២សប្ដាហ៍ ហើយត្រូវបណ្ដេញចេញពីប្រទេស រួមទាំងបញ្ជាឲ្យលុបចោលគណនី Instagram របស់ពួកគេ ដែលបានបង្ហោះរូបភាពមិនសមរម្យចោល៕