គណបក្ស កែម ឡី ត្រូវប្ដូរឈ្មោះថ្មី១ផ្សេងទៀត ដើម្បីឲ្យក្រសួងមហាផ្ទៃទទួលស្គាល់
- 2018-03-24 03:17:21
- ចំនួនមតិ 0 | ចំនួនចែករំលែក 0
គណបក្ស កែម ឡី ត្រូវប្ដូរឈ្មោះថ្មី១ផ្សេងទៀត ដើម្បីឲ្យក្រសួងមហាផ្ទៃទទួលស្គាល់
ចន្លោះមិនឃើញ
តំណាងស្ថាបនិកគណបក្ស កែម ឡី បានសម្រេចប្តូរឈ្មោះ គណបក្ស កែម ឡី ទៅជាគណបក្ស ខ្មែរតែមួយ ដើម្បីឲ្យស្របតាមច្បាប់ស្តីពីគណបក្សនយោបាយ ដែលមិនតម្រូវឲ្យយកតាមឈ្មោះរូបវន្តបុគ្គលមកប្រើ។
សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី០៥ ខែមីនា ឆ្នាំ២០១៨ បានធ្វើលិខិតឆ្លើយតបទៅលោក គុជ លី តំណាងស្ថាបនិកគណបក្ស កែម ឡី ដោយបានស្នើឲ្យបំពេញតាមលក្ខខណ្ឌនានាដែលបានកំណត់ក្នុងបទប្បញ្ញត្តិមាត្រា ១១ថ្មី មាត្រា១៩ថ្មី និងមាត្រា២០ នៃច្បាប់ស្តីពីគណបក្សនយោបាយ។ ការស្នើនេះ គឺដើម្បីឲ្យការបង្កើតគណបក្ស កែម ឡី ទទួលបានភាពត្រឹមត្រូវ និងសុពលភាព ព្រមទាំងអាចធ្វើសកម្មភាពស្របតាមច្បាប់។
ការឆ្លើយតបរបស់សម្តេច ស ខេង យ៉ាងដូច្នេះ មានន័យថា ក្រសួងមហាផ្ទៃមិនអនុញ្ញាតឲ្យយកឈ្មោះ កែម ឡី មកប្រើក្នុងការដាក់ឈ្មោះគណបក្ស កែម ឡី ឡើយ។ សូមជម្រាបថា ពាក្យស្នើសុំបង្កើតគណបក្ស កែម ឡី ត្រូវបានដាក់ចូលដល់សម្តេច ស ខេង កាលពីថ្ងៃទី០២ ខែមីនា ឆ្នាំ២០១៨។
យោងតាមមាត្រា១១ថ្មី នៃច្បាប់ស្តីពីគណបក្សនយោបាយ បានចែងថា គ្រប់គណបក្សនយោបាយត្រូវមានឈ្មោះ និងសញ្ញាសម្គាល់តាមការកំណត់ដូចខាងក្រោម៖
១- ឈ្មោះជាអក្សរពេញ ជាអក្សរកាត់ និងសញ្ញាសម្គាល់របស់គណបក្សនយោបាយ ត្រូវតែខុសគ្នាពីឈ្មោះជាអក្សរពេញ ឬអក្សរកាត់ និងសញ្ញាសម្គាល់របស់គណបក្សនយោបាយនានា។
២- ឈ្មោះគណបក្សនយោបាយមិនត្រូវធ្វើឡើង ដោយគ្រាន់តែកែសម្រួលបន្តិចបន្តួចនៅលើឈ្មោះគណបក្សនយោបាយនានា ឬយកឈ្មោះរូបវន្តបុគ្គលមកដាក់ឡើយ។
៣- សញ្ញាសម្គាល់របស់គណបក្សនយោបាយ មិនត្រូវចម្លង ឬយកតាមសញ្ញាជាតិ រូបភាពតំណាងឲ្យសាសនា ប្រាសាទអង្គរវត្ត ឬព្រះឆាយាល័ក្ខណ៍ ឬរូបសំណាករបស់ព្រះមហាក្សត្រខ្មែរគ្រប់អង្គ ឬរូបភាពរបស់រូបវន្តបុគ្គលឡើយ៕