Real Madrid ស៊ុត ៣០ជើង តែបានត្រឹមស្មើ Atletico Madrid

2018-04-08 23:25:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអធិរាជ ស Real Madrid បានគ្រប់គ្រងបាល់ ៦៩ភាគរយ និងស៊ុត ៣០ដង ប៉ុន្តែបានត្រឹមស្មើ ១-១ ទល់នឹងក្រុមគូប្រជែងរួមទីក្រុងម៉ាឌ្រីត Atletico Madrid ដែលស៊ុតបានតែ ៩ដង និងគ្រប់គ្រងបាល់បានតែ ៣១ភាគរយ ក្នុងការប្រកួតសប្ដាហ៍ទី៣១ នៃលីគកំពូលអេស្ប៉ាញ La Liga កាលពីយប់មិញនេះ។ (វីដេអូហាយឡាយ មាននៅផ្នែកខាងក្រោមនៃអត្ថបទ)

Ronaldo អបអរក្រោយស៊ុតបញ្ចូលទី

នៅក្នុងការប្រកួតនោះ ក្រុមទាំង២ បានរក្សាលទ្ធផលស្មើ ០-០ ក្នុងតង់ទី១។ ឈានដល់នាទី ៥៣ ទើបកីឡាករ Cristiano Ronaldo ស៊ុតបំបែកពងមាន់បានសម្រេច។ យ៉ាងណាក្ដី ក្រុមម្ចាស់ផ្ទះ អាចរក្សាលទ្ធផលនាំមុខនេះ បានត្រឹម ៤នាទី ក៏ត្រូវក្រុមភ្ញៀវតាមស្មើវិញ ដែលស៊ុតដោយខ្សែប្រយុទ្ធបារាំង Antoine Griezmann។

Griezmann អបអរក្រោយស៊ុតតាមស្មើ

គួរឲ្យកត់សម្គាល់ផងដែរថា ១គ្រាប់របស់ Ronaldo ជាគ្រាប់បាល់ទី២០ ក្នុង ១០ប្រកួតចុងក្រោយ ហើយក៏ជាគ្រាប់បាល់ទី ៦៥០ ក្នុងអាជីពរបស់កីឡាករព័រទុយហ្គាល់រូបនេះផងដែរ។ កីឡាកររូបនេះ ត្រូវគ្រូបង្វឹក Zinedine Zidane ប្ដូរចេញនៅ ២៦នាទីចុងក្រោយ ដើម្បីសម្រាកត្រៀមប៉ះ Juventus ក្នុងជើងទី២ វគ្គ ៨ក្រុមចុងក្រោយ UEFA Champions League ថ្ងៃពុធសប្ដាហ៍នេះ។

Benzema ប្ដូរចូលជំនួស Ronaldo

Zidane បាននិយាយក្រោយការប្រកួតថា៖ "យើងមានការប្រកួតជាច្រើនទៀត ដូច្នេះគាត់ (Ronaldo) ត្រូវការសម្រាកខ្លះ។... ខ្ញុំរីករាយចំពោះទម្រង់លេងរបស់ក្រុម ប៉ុន្តែវាក៏ជារឿងដ៏អាម៉ាសដែរ ដែលយើងមិនអាចយកជ័យជម្នះបាន ហើយស្ទើតែភ្លាត់ចាញ់ចុងម៉ោងថែមទៀតផង"។

សូមបញ្ជាក់ថា លទ្ធផលស្មើ ១-១ នេះ ធ្វើឲ្យ Atletico នៅតែឈរលេខ២ ក្នុងតារាងពិន្ទុ លើសក្រុម Real ដែលឈរលេខ៤ ចំនួន ៤ពិន្ទុ ប៉ុន្តែចាញ់ក្រុមកំពូលតារាង Barcelona ចំនួន ១១ពិន្ទុ៕