តំបន់​ផ្លូវ​៦០​ម៉ែត្រ នឹង​ក្លាយជា​តំបន់​បណ្តុំ​ពាណិជ្ជកម្ម​នាពេល​អនាគត

  • 2018-04-13 01:03:48
  • ចំនួនមតិ 0 | ចំនួនចែករំលែក 60

ចន្លោះមិនឃើញ

អ្នក​ជំនួញ​រកស៊ី​ក្នុង​វិស័យ​អចលនទ្រព្យ​បាន​លើកឡើង​ថា តំបន់​ផ្លូវ ៦០​ម៉ែត្រ ឬ​មហាវិថី​សម្តេច​តេជោ ហ៊ុន សែន ស្ថិត​នៅ​ភាគខាងត្បូង​នៃ​រាជធានី​ភ្នំពេញ កំពុង​មានការ​អភិវឌ្ឍ​បោះពួយ​យ៉ាងលឿន​បន្ទាប់ពី​មហា​វិថី​ដ៏ធំ​មួយ​នេះ បាន​ដាក់​សម្ពោធ​ឲ្យ​ប្រើប្រាស់​កាលពី​ខែ​មេសា ឆ្នាំ​២០១៧។ នៅពេល​អនាគត​តំបន់​នេះ​ នឹង​ក្លាយ​ទៅជា​ទិសដៅ​នៃ​តំបន់​បណ្តុំ​ពាណិជ្ជកម្ម​ដ៏​លេចធ្លោ​មួយ​ក្នុង​រាជធានី​ភ្នំពេញ។

ផ្លូវ ៦០ម៉ែត្រ នៅចំណុចក្រុមហ៊ុន Mercedes។ រូបថត៖ ខែមេសា ឆ្នាំ២០១៨

លោក ពឹង សិរី នាយក​ប្រតិបត្តិ​ក្រុមហ៊ុន​ Cambodia Angkor Real Estate បានថ្លែង​ប្រាប់​ខ្លីៗ​ឲ្យដឹង​ថា សន្ទុះ​នៃ​ការ​អភិវឌ្ឍ​នៅ​តាម​ផ្លូវ ៦០ម៉ែត្រ​នេះ មិន​ចាញ់គ្នា​ប៉ុន្មាន​នោះទេ បើធៀប​នឹង​តំបន់​ផ្សារ​ទំនើប​អ៊ីអនម៉ល​ទី២ ស្ថិតក្នុង​ខណ្ឌ​សែនសុខ។​

ដោយសារតែ​ហេដ្ឋារចនា​សម្ព័ន្ធ​មាន​ភាព​ល្អប្រសើរ រួមទាំង​សក្តានុពល​ទីតាំង​ទៀត​ផងនោះ លោក សិរី បាន​អះអាង​ថា វិនិយោគិន​ទាំងក្នុង​ និង​ក្រៅស្រុក​ បាននឹង​កំពុង​សម្លឹង​មើល​ឱកាស​វិនិយោគ​នៅក្នុង​តំបន់​ផ្លូវ ៦០ម៉ែត្រ​នេះ។

សូម​ជម្រាប​ថា មហាវិថី​សម្តេច​តេជោ​ហ៊ុនសែន គឺ​ឆ្លងកាត់​បឹង​ជើងឯក និង​បឹងទំពុន ភ្ជាប់ពី​ផ្លូវលេខ​២៧១ ត្រង់​ចំណុច​ច្រមុះ​ជ្រូក​ក្បាលថ្នល់ ខណ្ឌ​ចំការមន រាជធានី​ភ្នំពេញ ទៅ​ភ្ជាប់​ជាមួយ​ផ្លូវជាតិ​លេខ២ ត្រង់ចំណុច​ព្រែក​កំពឹស ក្រុង​តាខ្មៅ ខេត្ត​កណ្តាល។

មហា​វិថី​នេះ​ត្រូវបាន​សាងសង់​ដោយ​​ក្រុមហ៊ុន ING Holding ដែល​ជាម្ចាស់​គម្រោង​ទីក្រុង​រណប ING City ចំណាយ​ថវិកា​ប្រមាណ ៧៦​លាន​ដុល្លារ។ គម្រោង​ទីក្រុង​រណប​នេះ​មាន​ផ្ទៃក្រឡា​សាងសង់ ២៥៧២​ហិចតា ស្ថិតនៅ​ក្នុង​ខណ្ឌមានជ័យ ខណ្ឌ​ដង្កោ និង​ក្រុង​តាខ្មៅ។

បច្ចុប្បន្ន មាន​គម្រោង​ខ្លះ​បាន​លេច​រូបរាង​ហើយ ខណៈ​ខ្លះទៀត​កំពុង​អភិវឌ្ឍ​នៅតាម​បណ្តោយ​ផ្លូវ ៦០ម៉ែត្រ​នេះ។ តួយ៉ាង​គម្រោង​អភិវឌ្ឍន៍​ចម្រុះ​របស់​ក្រុមហ៊ុន​ចិន R&F Property រួមមាន​ទាំង​លំនៅឋាន អគារ​ពាណិជ្ជកម្ម  និង​ផ្សា​​រទំនើប​ជាដើម​ផង​នោះ ក្រោម​ការ​បោះទុន​វិនិយោគ​ប្រមាណ ៧០០​លាន​ដុល្លារ។ គម្រោង​វិនិយោគ​ដ៏ធំ​របស់​ចិន​មួយ​នេះ ត្រូវបាន​បើក​ការដ្ឋាន​សាងសង់​កាលពី​ចុងឆ្នាំ​២០១៧ លើ​ផ្ទៃដី​ប្រមាណ​ជាង ៨​ហិចតា។

មិនតែ​ប៉ុណ្ណោះ គម្រោង​ផ្សារ​ទំនើប PH Diamond Place របស់​ក្រុមហ៊ុន​បុរី ប៉េងហួត ទើបតែ​ត្រូវ​បាន​បើក​ការដ្ឋាន​សាងសង់​កាលពី​ចុងខែ​មីនា ដោយ​ចំណាយ​ទុន​រហូតដល់​៦០​លានដុល្លារ ​ស្ថិតលើ​ផ្ទៃដី ៦ហិចតា ហើយ​គ្រោងនឹង​បញ្ចប់​នៅឆ្នាំ​២០២០​ខាងមុខ។ ក្រៅពីនេះ ក៏មាន​វត្តមាន អគារ​ដាក់តាំង​បង្ហាញ​រថយន្ត​របស់​ក្រុមហ៊ុន Mercedes និង​សាលា​អន្តរជាតិ ISPP ជាដើម។

ប្រជាពលរដ្ឋកំពុងធ្វើដំណើរនៅលើផ្លូវ ៦០ម៉ែត្រ។ រូបថត៖ ខែមេសា ឆ្នាំ២០១៨

លោក ពឹង សិរី បានមាន​ប្រសាសន៍​ថា “ចរន្ត​ទិញ​លក់​នៃ​វិស័យ​ដីធ្លី​ក្នុង​តំបន់​ផ្លូវ ៦០ ម៉ែត្រ​ កំពុង​មាន​ភាព​សស្រាក់​សស្រាំ ចំណែក​តម្លៃ​ដី​ដែល​ចាក់​បំពេញ​ហើយ អាចមាន​ចាប់ពី ៥០០ ទៅ ៧០០ ដុល្លារ​ក្នុង​១ម៉ែត្រ​ការ៉េ”។ មិនតែ​ប៉ុណ្ណោះ​ ភាគ​ខាងត្បូង មាន​ច្រក​ចេញចូល​ច្រើន ហើយ​មាន​ទាំង​តំបន់​សេដ្ឋកិច្ច​ពិសេស និង​គម្រោង​លំនៅឋាន​ធំៗ ត្រូវ​បាន​អភិវឌ្ឍ​ក្នុង​តំបន់​នេះ​ផងដែរ។

ទន្ទឹមនឹង​នេះ អគ្គនាយកក្រុមហ៊ុន  Key Real Estate បាន​ថ្លែង​ឲ្យដឹងដែរ​ថា តំបន់​ភាគខាង​ត្បូង​កំពុង​មាន​សកម្មសភាព​អភិវឌ្ឍន៍​លេចធ្លោ​ជាងគេ​មួយ​ក្នុង​ចំណោម​តំបន់​នានា​នៅ​​រាជធានី​ភ្នំពេញ​នាពេល​បច្ចុប្បន្ននេះ៕


អត្ថបទ៖ ឈុត សិរីឧត្តម