ស្លាប់ និងរបួសជិត ៣ពាន់នាក់ ក្នុងពិធីអបអរសង្ក្រាន្តឆ្នាំថ្មីរយៈពេល៤ថ្ងៃនៅថៃ

2018-04-15 09:55:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើគិតចាប់ពីថ្ងៃទី១១ ដល់ថ្ងៃទី១៤ ខែមេសា ឆ្នាំ២០១៨ អ្នកស្លាប់ដោយសារតែគ្រោះថ្នាក់ចរាចរណ៍នៅប្រទេសថៃ មានចំនួនសរុប ២៤៨នាក់ ខណៈឯអ្នករបួសមាន ២៥៥៧នាក់។ ទិន្នន័យនេះគឺទទួលបានពីលោក Opas Karnkawinpong រដ្ឋលេខាធិការរងអចិន្ត្រៃយ៍នៃក្រសួងសុខភាពសាធារណៈថៃ នៅថ្ងៃទី១៥ ខែមេសា ឆ្នាំ២០១៨នេះ។

គ្រោះថ្នាក់ចរាចរណ៍នៅថៃ (រូបឯកសារ)/ រូបភាព៖ AP

លោក Opas ប្រាប់ថា គ្រោះថ្នាក់ចរាចរណ៍នៅថៃរយៈពេល៤ថ្ងៃកន្លងមកនេះ មានចំនួនសរុប ២៤៤៩ករណី កើនឡើង ២,៩% បើធៀបនឹងឆ្នាំ២០១៧។ ចំណែកលោក Sirichan Ngathong អ្នកនាំពាក្យរងនៃក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់ បាននិយាយថា ស្ថិតនៅក្នុងរយៈពេលដដែលនេះ ប៉ូលិសថៃបានធ្វើការឃាត់យានយន្តចំនួន ៧០៦៧គ្រឿង ក្នុងនោះមានម៉ូតូ ៥០១៩គ្រឿង និងរថយន្ត ២០៤៨គ្រឿង ដែលត្រូវបានរកឃើញមានជាតិស្រវឹងនៅក្នុងខ្លួនម្ចាស់យានយន្ត។ បន្ថែមពីនេះ ប៉ូលិសក៏បានរឹបអូសបណ្ណបើកបរចំនួន ១៦៥៨៨បណ្ណ ចាត់វិធានការច្បាប់ចំពោះអ្នកបើកម៉ូតូបាន ៨២៥៩៨នាក់ និងម្ចាស់រថយន្ត ៤៧៣២៧នាក់។

សូមបញ្ជាក់ថា នៅក្នុងរយៈពេល៧ថ្ងៃនៃពិធីអបអរបុណ្យចូលឆ្នាំថ្មី គិតចាប់ពីថ្ងៃទី១១ ដល់ ១៧ ខែមេសា ជារៀងរាល់ឆ្នាំ ត្រូវរដ្ឋាភិបាលថៃចាត់ទុកជា ថ្ងៃគ្រោះថ្នាក់បំផុតប្រចាំឆ្នាំ ដែលមានអត្រាអ្នកស្លាប់ និងរបួសដោយសារគ្រោះថ្នាក់ចរាចរណ៍ច្រើនបំផុត៕

ប្រភព៖ Bangkokpost ប្រែសម្រួល៖ ឈាង.