អ្នកដំណើរតាមរថភ្លើងទៅមក ប៉ោយប៉ែត-សិរីសោភ័ណ ក្នុង២សប្តាហ៍ មានជិត ៩ពាន់នាក់

2018-04-20 03:59:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានឲ្យដឹងនៅព្រឹកនេះថា ការដឹកជញ្ជូនអ្នកដំណើរតាមផ្លូវដែក ពីប៉ោយប៉ែត-សិរីសោភ័ណ (ទៅមក) បានចំនួនប្រមាណ ៨៩៨៤នាក់ហើយ គិតចាប់ពីថ្ងៃទី៤ ដល់ថ្ងៃទី១៨ ខែមេសា ឆ្នាំ២០១៨។

រថភ្លើងពីប៉ោយប៉ែត-សិរីសោភ័ណ (រូបថត៖ ហ្វេសប៊ុកក្រសួងសាធារណការ បង្ហោះនៅព្រឹកថ្ងៃទី២០ ខែមេសា ឆ្នាំ២០១៨)

សូមរម្លឹកថា ផ្លូវរថភ្លើងពីប៉ោយប៉ែត-សិរីសោភ័ណ ក្នុងខេត្តបន្ទាយមានជ័យ ត្រូវបានបើកឲ្យដំណើរការជាបណ្តោះអាសន្នកាលពីថ្ងៃទី៤ ខែមេសា ឆ្នាំ២០១៨។ ប្រជាពលរដ្ឋអាចធ្វើដំណើរតាមរថភ្លើងនេះ ដោយឥតគិតថ្លៃរហូតដល់ថ្ងៃទី១ ខែសីហា ឆ្នាំ២០១៨។

ពេលវេលាចេញដំណើរតាមរថភ្លើងពីប៉ោយប៉ែតទៅសិរីសោភ័ណ រួមមាន៖ ម៉ោង ០៧ព្រឹក ម៉ោង ១០ និង ៣០នាទី ម៉ោង២ និង ១៥ នាទីរសៀល និងចេញពីក្រុងសិរីសោភ័ណ ទៅក្រុងប៉ោយប៉ែត មានម៉ោង ៨ និង ៤០នាទីព្រឹក ម៉ោង ១២ និង៤៥នាទី និងម៉ោង ០៤ល្ងាច។

ផ្លូវដែកនេះមានប្រវែង ៤៨គីឡូម៉ែត្រ ដោយរថភ្លើងអាចធ្វើដំណើរក្នុងល្បឿនជាមធ្យម ៤០គីឡូម៉ែត្រក្នុង១ម៉ោង ប្រើថេរវេលា ១ម៉ោង ១៥នាទី ផ្ទុកអ្នកដំណើរបានប្រមាណ ១០០នាក់ ( អង្គុយ ៥៦នាក់)៕

អត្ថបទ៖ សំភី