កែវ សុខផេង ត្រូវគ្រូបង្វឹកបញ្ចប់កុងត្រា មុនកាលកំណត់

2018-04-28 06:26:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Abu Bakar Fadzim គ្រូបង្វឹកក្លឹបបាល់ទាត់ PKNP បានបញ្ជាក់ថា លោកបានបញ្ចប់កុងត្រារបស់ កែវ សុខផេង ហើយ។ ការប្រកាសនេះ បានធ្វើឡើងក្នុងសន្និសីទសារព័ត៌មាន បន្ទាប់ពីក្លឹប PKNP ប្រកួតស្មើជាមួយក្លឹប PKNS ១-១ កាលពីយប់មិញ។ នេះបើតាមការដកស្រង់សម្ដីគ្រូបង្វឹក ពីសារព័ត៌មាន Goal ដែលចុះផ្សាយនៅថ្ងៃទី២៨មេសានេះ។

លោក Fadzim បានបញ្ជាក់ថា សុខផេង លេងមិនត្រូវជើងជាមួយសមាជិកក្រុមដទៃទៀតឡើយ។ ម្យ៉ាងទៀត អតីតកីឡាករភ្នំពេញក្រោនរូបនេះ មានកាយសម្បទាមិនសូវអំណោយផល និងលេងដោយមិនមានការការពារ។ ក៏ប៉ុន្តែ ការគ្រប់គ្រងបាល់របស់ សុខផេង មានភាពល្អប្រសើរ។ លោកបន្តថា ភាគីទាំងសងខាង បានយល់ព្រមគ្នាលើការបញ្ចប់កុងត្រានេះ។

យ៉ាងណាក្ដី សាមីកីឡាករ និងក្លឹប មិនទាន់បញ្ជាក់ពីការផ្តាច់កុងត្រានេះនៅឡើយទេ។

សូមបញ្ជាក់ថា ខ្សែប្រយុទ្ធជម្រើសជាតិកម្ពុជា កែវ សុខផេង បានចុះកុងត្រារយៈពេល ១ឆ្នាំនៅក្លឹប PKNP F.C (Perak State Development Corporation Football Club) របស់ម៉ាឡេស៊ី កាលពីថ្ងៃទី១១ ខែធ្នូ ឆ្នាំ២០១៧ ក្រោយចប់កុងត្រានៅភ្នំពេញក្រោន។ សុខផេង ជាកីឡាករកម្ពុជា១រូប ក្នុងចំណោមកីឡាករកម្ពុជា ៤រូប ដែលចុះកុងត្រាលេងនៅក្លឹបក្នុងលីគកំពូលម៉ាឡេស៊ីរដូវកាលនេះ ដែលរួមមាន ចាន់ វឌ្ឍនាកា (Pahang FA) ប្រាក់ មុន្នីឧត្ដម (Negari Sembilan) និងធារី ចន្ថាប៊ីន (Terengganu FC)៕

អត្ថបទ៖ លាភ.