គណបក្សខ្មែរតែមួយ របស់ប្អូនប្រុសលោកកែម ឡី ដាក់បញ្ជីបេក្ខជននៅ គ.ជ.ប

2018-05-11 02:34:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី១១ ខែឧសភា នេះ គណបក្សខ្មែរតែមួយ របស់លោក កែម រិទ្ធិសិត ប្អូនប្រុសលោកបណ្ឌិត កែម ឡី បានទៅចុះបញ្ជីឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ក្នុងការបោះឆ្នោតជ្រើសតាំងតំណាងរាស្រ្ដ នីតិកាលទី៦ ឆ្នាំ២០១៨ នៅគណៈកម្មាធិការជាតិរៀបចំការបោះឆ្នោត (គ.ជ.ប)។

លោក គុជ លី (ឆ្វេង) អនុប្រធានគណបក្សខ្មែរតែមួយ ដាក់បញ្ជីបេក្ខជនឈរឈ្មោះ នៅ គ.ជ.ប

លោក គុជ លី អនុប្រធានគណបក្សខ្មែរតែមួយ បានថ្លែងឲ្យដឹងថា គណបក្សខ្មែរតែមួយ ដាក់បេក្ខជនឈរឈ្មោះចំនួន ១៦ រាជធានី-ខេត្ត។ បេក្ខជនឈរឈ្មោះសរុប ចំនួន ២២៨នាក់ (ស្រី ៦១នាក់)។

លោកបញ្ជាក់ថា លោក កែម រិទ្ធិសិត ប្រធានគណបក្សខ្មែរតែមួយ ឈរឈ្មោះនៅមណ្ឌលខេត្តតាកែវ ដែលជាស្រុកកំណើតរបស់លោក។ ចំណែករូបលោក (គុជ លី) ដែលជាអនុប្រធានគណបក្ស ឈរឈ្មោះនៅមណ្ឌលខេត្តសៀមរាប។

លោក គុជ លី អះអាងទៀតថា គណបក្សខ្មែរតែមួយ នឹងទទួលបានអាសនៈនៅក្នុងរដ្ឋសភា ទោះបីតិច ឬច្រើន ត្រូវតែមានជាដាច់ខាត។

លោកកែម រិទ្ធិសិត ប្រធានគណបក្សខ្មែរតែមួយ

សូមបញ្ជាក់ថា ចាប់ពីថ្ងៃទី៣០ ខែមេសា ដល់ថ្ងៃទី១១ ខែឧសភានេះ មានគណបក្សចំនួន ៦ ហើយ ដែលបានទៅចុះបញ្ជីឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ដែលរួមមាន គណបក្សប្រជាជនកម្ពុជា គណបក្សយុវជនកម្ពុជា គណបក្សសញ្ជាតិកម្ពុជា គណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សខ្មែរតែមួយ។ ក្នុងចំណោមគណបក្សចំនួន ៦ នោះ មានគណបក្សចំនួន ៣ ត្រូវ គ.ជ.ប ទទួលស្គាល់ជាផ្លូវការ គឺគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា។ ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ នឹងបន្តរហូតដល់ថ្ងៃទី១៤ ខែឧសភា៕