ដឹងថ្ងៃបិទទីតាំងធ្វើតេស្តនុយក្លេអ៊ែរ របស់កូរ៉េខាងជើងហើយ

2018-05-12 14:21:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កូរ៉េខាងជើង នឹងបិទទីតាំងធ្វើតេស្តនុយក្លេអ៊ែររបស់ខ្លួនពីថ្ងៃទី២៣ ដល់ ២៥ ខែឧសភា ឆ្នាំ២០១៨ ខាងមុខនេះ ដោយបានអញ្ជើញអ្នកសារព័ត៌មានបរទេសចូលរួមផងដែរ។ នេះបើតាមការចេញផ្សាយរបស់ភ្នាក់ងារសារព័ត៌មានកូរ៉េខាងជើង KCNA នៅថ្ងៃទី១២ ខែឧសភា ឆ្នាំ២០១៨នេះ។

មីស៊ីល ដែលកូរ៉េខាងជើងបានបាញ់សាកល្បងកាលពីពេលកន្លងមក

កូរ៉េខាងជើង នឹងបំផ្ទុះគ្រាប់បែកនៅគ្រប់ច្រកក្រោមដីទាំងអស់ដែលជាទីតាំងសាកល្បងនុយក្លេអ៊ែរ ហើយបិទច្រកចូលថែមទៀតផង។ ចំណែកឯកន្លែងអង្កេត អគារស្រាវជ្រាវ និងប៉ុស្តិ៍សន្តិសុខទាំងអស់ ក៏នឹងត្រូវរុះរើផងដែរ។

អ្នកសារព័ត៌មានបរទេស ដែលត្រូវបានកូរ៉េខាងជើង អញ្ជើញឱ្យចូលរួមក្នុងការតាមដានព្រឹត្តិការណ៍នេះ គឺមកពីចិន រុស្ស៊ី កូរ៉េខាងត្បូង អង់គ្លេស និងអាមេរិក។

ការប្រកាសបិទទីតាំងនុយក្លេអ៊ែរ ធ្វើឡើងភ្លាមៗបន្ទាប់ពីលោករដ្ឋមន្ត្រីការបរទេសអាមេរិក Mike Pompeo បានបញ្ជាក់កាលពីម្សិលមិញថា អាមេរិកនឹងជួយស្ដារសេដ្ឋកិច្ចកូរ៉េខាងជើងឡើងវិញ ប្រសិនបើរបបដឹកនាំរបស់លោក គីម ជុងអ៊ុន យល់ព្រមរំសាយកម្មវិធីនុយក្លេអ៊ែរទាំងស្រុង។

គួររម្លឹកផងដែរថា កាលពីថ្ងៃទី១០ ខែឧសភា ឆ្នាំ២០១៨ លោក ដូណាល់ ត្រាំ ប្រធានាធិបតីអាមេរិក បានប្រកាសជួបជាមួយលោក គីម ជុងអ៊ុន នាថ្ងៃទី១២ ខែមិថុនា ឆ្នាំ២០១៨ នៅប្រទេសសិង្ហបុរី៕

ប្រភព៖ RT ប្រែសម្រួល៖ សំភី