បង្គារបស់វៀតណាម នឹងត្រូវត្រួតពិនិត្យសារធាតុគីមី ដោយប្រទេសអាស៊ីមួយ

2018-05-17 02:57:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមសមាគមអ្នកផលិត និងនាំចេញគ្រឿងសមុទ្រវៀតណាម (VASEP) បានឲ្យដឹងថា នៅខែមិថុនា ឆ្នាំ២០១៨ខាងមុខនេះ ប្រទេសកូរ៉េខាងត្បូងនឹងបញ្ជូនក្រុមត្រួតពិនិត្យរបស់ខ្លួន ទៅកាន់ប្រទេសវៀតណាម ដើម្បីវាយតម្លៃលើសកម្មភាពនៃការប្រើប្រាស់សារធាតុគីមី និងអង់ទីប៊ីយ៉ូទីក នៅក្នុងបង្គាដែលត្រូវនាំចេញទៅកាន់ទីផ្សារកូរ៉េខាងត្បូង។

សកម្មភាពនៅរោងចក្រកែច្នៃបង្គា នៅវៀតណាម (រូបថត៖ baochinhphu)

ការប្រកាសនេះ ត្រូវធ្វើឡើងក្រោយពីក្រសួងសុវត្ថិភាពចំណីអាហារ និងឱសថកូរ៉េខាងត្បូង ផ្ញើលិខិតចំនួន ២ ទៅកាន់វៀតណាម កាលពីខែមេសា ស្ដីពីការរកឃើញនូវសារធាតុ Nitrofurans ក្នុងបង្គាដែលនាំចូលពីវៀតណាម។ សារធាតុ Nitrofurans អាចបង្កជាជំងឺរាគ ឈឺដើមទ្រូង ពិបាកដកដង្ហើម អស់កម្លាំងជាដើម។

បង្គានាំចេញពីវៀតណាមទៅកូរ៉េខាងត្បូង ដែលមានផ្ទុកសារធាតុ Nitrofurans ត្រូវបានរកឃើញកាលពីខែមករា ដល់ខែមេសា ឆ្នាំ២០១៨។

VASEP បានឲ្យដឹងថា វត្តមាននៃសារធាតុអង់ទីប៊ីយ៉ូទីក និងភាពមិនបរិសុទ្ធក្នុងបង្គា ជាបញ្ហាដ៏ស្មុគស្មាញ២យ៉ាង ដែលមិនទាន់ត្រូវបានដោះស្រាយបានទាំងស្រុង និងប្រកបដោយប្រសិទ្ធភាពនៅឡើយ។

សូមបញ្ជាក់ថា កូរ៉េខាងត្បូង ជាប្រភពដែលនាំចូលបង្គាវៀតណាម ធំទី៨ បន្ទាប់ពី សហភាពអឺរ៉ុប អាមេរិក ជប៉ុន ចិន អូស្ត្រាលី កាណាដា និងអាស៊ាន៕

ប្រភព៖ Vietnam News ប្រែសម្រួល៖ លាភ.