អ្នកជំនាញ ប្រតិកម្មនឹងគម្រោងវិនិយោគរបស់ក្រុមហ៊ុនកសិកម្មវៀតណាម

2018-05-17 06:57:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកជំនាញផ្នែកកសិកម្ម លោក យ៉ង សាំងកុមារ បាននិយាយនៅថ្ងៃទី១៧ ខែឧសភា ឆ្នាំ២០១៨នេះថា ដើម្បីផលប្រយោជន៍ជាតិវែងឆ្ងាយ គឺលោកមិនគាំទ្រឱ្យក្រុមហ៊ុនវៀតណាម មកវិនិយោគលើវិស័យកសិកម្មនៅកម្ពុជានោះទេ។

លោកលើកឡើងថា លោកចង់ឱ្យប្រជាពលរដ្ឋខ្មែរ ចេះប្រើប្រាស់ដីក្នុងការដាំដុះ និងផលិតដោយខ្លួនឯង ដើម្បីឈានដល់ការនាំចេញ បង្កើតការងារក្នុងស្រុក និងកំណើនសេដ្ឋកិច្ច។

លោក យ៉ង សាំងកុមារ ផ្ដល់បទសម្ភាស១ កាលពីថ្ងៃទី៩ កក្កដា ឆ្នាំ២០១៥។ រូបថត៖ RFA

លោកបានបន្តថា ដើម្បីធ្វើការងារនេះ លុះត្រាតែមានធនធានមនុស្ស និងអ្នកដឹកនាំកសិករ ជាពិសេសកសិករផ្ទាល់ត្រូវចេះសហការគ្នា ត្រូវមានអ្នកជំនាញដើម្បីគាំទ្រលើផ្នែកបច្ចេកទេស កសិករត្រូវចងក្រងជាក្រុម ឬសហគមន៍ និងរដ្ឋាភិបាល ដើម្បីនាំកសិផលចូលក្នុងទីផ្សារ។

ការលើកឡើងនេះ ក្រោយក្រុមហ៊ុនធំមួយរបស់វៀតណាម គឺក្រុមហ៊ុន FLC Group ចង់បោះទុនជាទឹកប្រាក់ប្រមាណ១ពាន់លានដុល្លារ នៅឆ្នាំ២០១៩ខាងមុខ វិនិយោគលើការដាំដុះបន្លែ និងផ្លែឈើសម្រាប់នាំចេញ និងផ្គត់ផ្គង់ទេសចរក្នុងស្រុក។ គម្រោងនេះបានបង្ហាញក្នុងជំនួបរវាងលោកវេង សុខុន រដ្ឋមន្ត្រីក្រសួងកសិកម្ម និងប្រតិភូក្រុមហ៊ុនវៀតណាម FVC Group កាលពីថ្ងៃទី១០ ខែឧសភាកន្លងទៅ។ គម្រោងនេះ ក៏ធ្វើឱ្យមានការបារម្ភ និងរិះគន់ពីក្រុមអ្នកជំនាញកសិកម្ម និងប្រជាពលរដ្ឋមួយចំនួនផងដែរ ជាពិសេសអ្នកប្រើប្រាស់បណ្តាញសង្គមហ្វេសប៊ុក។

ក្នុងបទសម្ភាសន៍មួយជាមួយភ្នាក់ងារសារព័ត៌មាន Fresh News កាលពីម្សិលមិញនេះ លោកវេង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចាត់ទុកក្តីបារម្ភទាំងនេះ ថាជាការទទួលព័ត៌មានមិនបានស៊ីជម្រៅ។ លោកថា ការជួបជាមួយប្រតិភូវៀតណាម កន្លងមក គឺគ្រាន់តែបង្ហាញពីបំណងចង់វិនិយោគលើវិស័យកសិកម្មកម្ពុជាតែប៉ុណ្ណោះ ដោយសារវិនិយោគិនវៀតណាមសម្លឹងឃើញ បន្លែ ផ្លែឈើវៀតណាមកំពុងមានបញ្ហា។

រដ្ឋមន្រ្តីក្រសួងកសិកម្ម ក្នុងជំនួបពិភាក្សាជាមួយប្រតិភូក្រុមហ៊ុនវៀតណាម FLC Group កាលពីថ្ងៃទី១០ ខែឧសភា ឆ្នាំ២០១៨ នៅទីស្តីការក្រសួង។ រូបថត៖ FB ក្រសួងកសិកម្ម

លោក វេង សុខុន ក៏បានបញ្ជាក់ដែលថា ក្រុមហ៊ុននេះមិនត្រឹមតែវិនិយោគលើវិស័យកសិកម្ម លើការដាំបន្លែ ម្ទេស និងផ្លែឈើ់ ដើម្បីផ្គត់ផ្គង់ក្នុងស្រុក និងនាំចេញប៉ុណ្ណោះទេ ក្រុមហ៊ុននេះ ក៏ចង់ធ្វើការកែច្នៃ និងវេចខ្ចប់ ផលិតផលកសិកម្ម នៅកម្ពុជាក្នុងការនាំចេញផងដែរ៕

ប្រភព៖ Vayo Fm ប្រែសម្រួល៖ សំភី