ជប៉ុន សហការជាមួយកម្ពុជា លើការបណ្តុះបណ្តាលបច្ចេកវិទ្យាកែច្នៃគ្រឿងបន្លាស់រថយន្ត

2018-05-23 04:48:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនជប៉ុន Sanyo Parts បានចុះអនុស្សារណៈនៃការយោគយល់គ្នាជាមួយសាលាមធ្យមសិក្សាបច្ចេកទេស JVC របស់កម្ពុជា ស្តីពីកិច្ចសហប្រតិបត្តិការផ្តល់ការបណ្តុះបណ្តាលបច្ចេកវិទ្យាកែច្នៃឡើងវិញនូវគ្រឿងបន្លាស់រថយន្ត។ ពិធីនេះ ធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងទី ២២ ខែឧសភា ឆ្នាំ២០១៨។

ពិធីចុះអនុស្សារណៈនៃការយោគយល់គ្នារវាង ក្រុមហ៊ុន Sanyo Parts និងសាលា JVC នៅក្រសួងការងារ កាលពីថ្ងៃទី២២ ខែឧសភា ឆ្នាំ២០១៨។ រូបថត៖ FB ក្រសួងការងារ

លោក Keiji Sakai នាយកប្រតិបត្តិក្រុមហ៊ុន Samyo Part បានឱ្យដឹងថា ក្រុមហ៊ុនលោកបានបង្កើតឡើងនៅក្នុងឆ្នាំ១៩៦៨ ដែលជាក្រុមហ៊ុនបោះដុំគ្រឿងបន្លាស់រថយន្ត។ ក្រុមហ៊ុននេះ បានផលិតគ្រឿងបន្លាស់រថយន្តក្នុងប្រទេសចិន និងចែកចាយក្នុងប្រទេសជប៉ុន។

លោកបន្តថា កាលពី៤ឆ្នាំមុន ក្រុមហ៊ុនរបស់លោកបានមកសិក្សាស្រាវជ្រាវពីទីផ្សារកម្ពុជា។ ក្រុមហ៊ុនបានរកឃើញថា កម្ពុជាបានប្រើប្រាស់រថយន្តជាច្រើន ដែលផលិតនៅជប៉ុន។ ប៉ុន្តែសម្រាប់ការប្រើប្រាស់គ្រឿងបន្លាស់រថយន្តនៅកម្ពុជា គឺនិយមប្រើប្រាស់គ្រឿងបន្លាស់មួយទឹក ដែលពុំមានបទដ្ឋានស្តង់ដាច្បាស់លាស់ ដើម្បីធានាសុវត្ថិភាពឡើយ។

លោកបញ្ជាក់ថា កត្តានេះហើយ ដែលក្រុមហ៊ុនរបស់លោក សហការជាមួយសាលា JVC ដើម្បីបង្កើតបច្ចេកវិទ្យាមួយ ដែលកែច្នៃគ្រឿងបន្លាស់រថយន្តចាស់ៗទាំងនោះ ឱ្យក្លាយទៅជាថ្មី និងមានស្តង់ដា ដើម្បីរក្សាបរិស្ថានស្អាត និងកាត់បន្ថយគ្រោះថ្នាក់ចរាចរណ៍ដែលបណ្តាលមកពីកំហុសបច្ចេកទេស ដោយសារការប្រើប្រាស់គ្រឿងបន្លាស់រថយន្តមួយទឹក។

សិស្សនៅសាលា JVC កំពុងរៀនជួសជុលរថយន្ត

លោក ពេជ្រ សោភ័ន រដ្ឋលេខាធិការក្រសួងការងារ បានមានប្រសាសន៍ថា នេះជាឱកាសមួយសម្រាប់ប្រជាពលរដ្ឋកម្ពុជា ដែលចង់មានជំនាញច្បាស់លាស់ ពាក់ព័ន្ធនឹងគ្រឿងបន្លាស់រថយន្ត។ បច្ចុប្បន្នទីផ្សារកម្ពុជា កំពុងតែត្រូវការជាចាំបាច់នូវជំនាញច្បាស់លាស់ក្នុងការផលិត និងជួសជុលគ្រឿងយន្ត៕