អ្នកជាន់ដីភពព្រះចន្ទមុនគេទី៤ បានទទួលមរណភាពហើយ

2018-05-27 04:36:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការណាសាបានប្រកាសថា លោក Alan Bean ដែលជាអ្នកជាន់ដីភពព្រះចន្ទមុនគេទី៤ បានទទួលមរណភាពហើយ ក្នុងអាយុ ៨៦ឆ្នាំ ដោយសារជំងឺ។

លោកបានស្លាប់នៅមន្ទីរពេទ្យ Houston Methodist ក្នុងរដ្ឋតិចសាស់ សហរដ្ឋអាមេរិក កាលពីថ្ងៃទី២៦ ខែឧសភា ឆ្នាំ២០១៨ម្សិលមិញនេះ។

លោក Alan Bean កំពុងចង្អុលទៅរូបខ្លួនឯង ក្នុងពិព័រណ៍មួយកាលពីថ្ងៃទី១៥ ខែកក្កដា ឆ្នាំ២០០៩ (រូបថត៖ AP)

លោក Alan Bean ក្លាយជាមនុស្សទី៤ ដែលបានដើរនៅលើភពព្រះចន្ទ កាលពីថ្ងៃទី១៩ ខែវិច្ឆិកា ឆ្នាំ១៩៦៩។ លោកធ្វើដំណើរទៅកាន់ទីនោះតាមរយៈបេសកកម្មអាប៉ូឡូទី១២ របស់អង្គការណាសា រួមជាមួយនឹងលោក Charles Pete Conrad (មនុស្សទី៣ ជាន់ដីភពព្រះចន្ទមុនគេ)។ អ្នកអវកាសទាំង២រូប បានប្រមូលថ្ម និងដីនៅលើភពនោះ ដែលមានទម្ងន់ ៣៤គីឡូម៉ែត្រ មកផែនដីវិញ ដើម្បីធ្វើការសិក្សា។

លោក Bean បានកើតនៅថ្ងៃទី១៥ ខែមីនា ឆ្នាំ១៩៣២ ក្នុងរដ្ឋតិចសាស់។ លោកបានទទួលបរិញ្ញាបត្រវិស្វកម្មអវកាសពីសាកលវិទ្យាល័យតិចសាស់ ក្នុងឆ្នាំ១៩៥៥។ លោកបានចូលរួមក្នុងសាលា Navy Test Pilot ដោយបានបើកយន្តហោះ ២៧ប្រភេទផ្សេងៗគ្នាជាមួយការហោះហើរជាង ៥៥០០ម៉ោង។ លោកស្ថិតក្នុងចំណោមមនុស្ស ១៤រូប ដែលត្រូវបានអង្គការណាសាជ្រើសរើស សម្រាប់ក្រុមអវកាសយានិកទី៣ ក្នុងខែតុលា ឆ្នាំ១៩៦៣។