ចិន គ្រោងបង្កើតក្រុងរណប១ នៅខេត្តព្រៃវែង

2018-05-30 06:28:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនចិន Jiangxi Haihui Utility Co.,Ltd គ្រោងនឹងអភិវឌ្ឍតំបន់នៅមុខសាលាខេត្តព្រៃវែង ទំហំ ៣០០ហិកតា ឱ្យក្លាយជារណប១ ដែលមានសក្តានុពលលើគ្រប់វិស័យរួមមាន៖ តំបន់កម្សាន្ត ខុនដូ តំបន់ពាណិជ្ជកម្ម និងជាតំបន់ឧស្សាហកម្មផងដែរ។ នេះបើតាមការលើកឡើងរបស់លោក Yu Hui Hua ប្រធានក្រុមហ៊ុននេះ ក្នុងកិច្ចប្រជុំជាមួយសម្តេច ស ខេង រដ្ឋមន្រ្តីក្រសួងមហាផ្ទៃ ស្តីពីគម្រោងវិនិយោគនេះ កាលពីថ្ងៃទី២៩ ខែឧសភា ឆ្នាំ២០១៨ នៅទីស្តីការក្រសួង។

សម្តេច ស ខេង ក្នុងកិច្ចប្រជុំជាមួយប្រតិភូក្រុមហ៊ុនចិន Jiangxi Haihui Utility Co.,Ltd កាលពីថ្ងៃទី២៩ ខែឧសភា ឆ្នាំ២០១៨ នៅទីស្តីការក្រសួង។ រូបថត៖ FB ក្រសួងមហាផ្ទៃ

លោក Yu Hui Hua សង្ឃឹមថា តាមរយៈគម្រោងនេះ ខេត្តព្រៃវែង នឹងមានអ្នកវិនិយោគ ភ្ញៀវទេសចរ និងប្រជាជនរស់នៅកើនឡើងនាពេលខាងមុខ។

ជាការឆ្លើយតប សម្តេច ស ខេង បានស្វាគមន៍ និងគាំទ្រចំពោះគម្រោងរបស់ក្រុមហ៊ុន ដែលចង់អភិវឌ្ឍខេត្តព្រៃវែង ឱ្យក្លាយជាទីក្រុងដែលមានភាពទាក់ទាញមួយសម្រាប់ទាក់អារម្មណ៍លើឆាកអន្តរជាតិ។ សម្តេចបន្តថា ប្រសិនបើគម្រោងនេះ អាចលេចរូបរាងឡើងនោះ ពិតជាផ្តល់ប្រយោជន៍ជាច្រើនមកដល់កម្ពុជារួមមាន៖ ការផ្តល់ការងារដល់ប្រជាពលរដ្ឋក្នុងមូលដ្ឋានផ្ទាល់ និងធ្វើឱ្យកម្ពុជាកាន់តែមានភាពរីកចម្រើនលើវិស័យសំណង់ផងដែរ។

ទន្ទឹមនឹងការគាំទ្រចំពោះគម្រោងនេះដែរ រដ្ឋមន្រ្តីមហាផ្ទៃ បានស្នើឱ្យក្រុមហ៊ុន Jiangxi Haihui Utility Co.,Ltd គោរពតាមគោលការណ៍ច្បាប់របស់ព្រះរាជាណាចក្រកម្ពុជា ដែលនឹងធ្វើឱ្យការវិនិយោគរបស់ក្រុមហ៊ុនទទួលបានភាពស្របច្បាប់ និងផ្តល់ភាពជឿជាក់ដល់អតិថិជនរបស់ខ្លួនផងដែរ៕

អត្ថបទ៖ សំភី