ថៃ ចង់ឲ្យវៀតណាមលុបបំបាត់របាំងពាណិជ្ជកម្មមិនមែនពន្ធលើការនាំចូលរថយន្ត

2018-06-13 04:07:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងឧស្សាហកម្ម និងក្រសួងពាណិជ្ជកម្មថៃ ទាមទារឲ្យរដ្ឋាភិបាលវៀតណាម លុបចោលនូវរបាំងពាណិជ្ជកម្មមិនមែនពន្ធលើការនាំចូលរថយន្តពីព្រះរាជាណាចក្រថៃ ខណៈដែលការដឹកជញ្ជួនរថយន្តពីប្រទេសថៃ ទៅកាន់ប្រទេសវៀតណាម ត្រូវបានរាំងស្ទះអស់រយៈ ពេលជាង ៦ ខែមកហើយ។ នេះបើតាមការចុះផ្សាយកាសែត Bangkokpost កាលពីថ្ងៃទី១២ មិថុនា ម្សិលមិញ។

ក្រុមហ៊ុននាំចេញរថយន្តរបស់ថៃ បានផ្អាកការដឹកជញ្ជួនរថយន្តរបស់ខ្លួន ក្រោយពីវៀតណាម ធ្វើការពិនិត្យយ៉ាងតឹងរ៉ឹងទៅលើលក្ខណៈបច្ចេកទេសរបស់រថយន្ត រួមមានដូចជា ការធន់ទៅនឹងបរិស្ថាន និងត្រូវតាមលក្ខណៈបច្ចេកទេសជាដើម។ ប៉ុន្តែ ទីតាំងពិនិត្យ មានទំហំតូច ជាហេតុបណ្ដាលមានការយឺតយ៉ាវដល់ដំណើរនាំចេញរថយន្ត។

អនុរដ្ឋមន្ត្រីក្រសួងឧស្សាហកម្មថៃ លោក Somchai Harnhiran បាននិយាយថា ក្រសួងទាំង២ កំពុងធ្វើការរៀបចំដោះស្រាយបញ្ហានេះ ស្របពេលដែល ពួកគេ កំពុងឃ្លាំមើលយ៉ាងល្អិតល្អន់ទៅលើរបាំងពាណិជ្ជកម្មមិនមែនពន្ធរបស់វៀតណាម ដែលត្រូវបានដាក់ចេញក្នុងឆ្នាំ២០១៨នេះ។

«ចាប់តាំងពីទីក្រុងហាណូយ បានដាក់ចេញគោលនយោបាយរបាំងពាណិជ្ជកម្មមិនមែនពន្ធមក ឧស្សាហកម្មរថយន្តថៃ បានបាត់បង់ការនាំចេញទៅកាន់ប្រទេសវៀតណាមប្រមាណជាង ៨០%»។ នេះជាការលើកឡើងរបស់លោក Somchai។

លោក Somchai Harnhiran ថ្លែងនាពេលកន្លងមក

លោក បានបន្តទៀតថា «រដ្ឋាភិបាលនៃប្រទេសទាំង២ នឹងជជែកពិភាក្សាគ្នាឆាប់ៗនេះ ហើយយើងសង្ឃឹមនឹងទទួលបាននូវសញ្ញាណវិជ្ជមាន។»

«រដ្ឋាភិបាលថៃ បានត្រៀមសម្រាប់ការវាយបកទៅលើផលិតផលរបស់វៀតណាម ដែលបាននាំចេញមកកាន់ប្រទេសថៃ ប៉ុន្តែវានៅមិនទាន់មានព័ត៌មានលម្អិតនៅឡើយទេ ពីព្រោះថា យើងអាចមានគម្រោង B បើសិនជាការចរចាទ្វេភាគីបរាជ័យ»។ នេះជាការបកស្រាយរបស់លោក Somchai ក្រោយជំនួបថ្មីៗនេះ ជាមួយក្រុមហ៊ុនផលិតរថយន្ត និងគ្រឿងបន្លាស់រថយន្ត។

មន្ត្រីខាងលើ បានបញ្ជាក់ទៀតថា ក្រុមហ៊ុនផលិតឡាន នៅក្នុងប្រទេសថៃ បានរាយការណ៍ថា ការនាំចេញរថយន្តទៅកាន់ប្រទេសវៀតណាម បានជាប់គាំងត្រឹម ៤៥៩០ គ្រឿង សម្រាប់ត្រីមាសទី១ ខណៈដែលគោលដៅប្រចាំឆ្នាំ មានចំនួន ៦៥០០០ គ្រឿង៕