លោក Duterte អនុម័តគម្រោងទំនើបកម្មយោធា ដែលមានទឹកប្រាក់រាប់ពាន់លានដុល្លារ

2018-06-21 08:04:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីហ្វីលីពីន លោក Rodrigo Duterte បានអនុម័តលើគម្រោងមួយ ដែលគ្រោងចំណាយប្រាក់ប្រមាណ ៥,៦ពាន់លានដុល្លារសម្រាប់ធ្វើទំនើបកម្មយោធា ក្នុងរយៈពេល ៥ឆ្នាំ។ នេះបើតាមបញ្ជាក់របស់មន្ត្រីការពារជាតិរបស់ហ្វីលីពីនមួយរូប កាលពីថ្ងៃទី២០ ខែមិថុនា ម្សិលមិញ។

លោក Duterte ចុះត្រួតពិនិត្យមូលដ្ឋានយោធាហ្វីលីពីន នាពេលកន្លងមក

ការយល់ព្រមលើគម្រោងទំនើបកម្មរបស់លោក Duterte នេះ បានធ្វើឡើងនៅក្នុងជំនួបមួយជាមួយប្រមុខការពារហ្វីលីពីន និងក្រុមមន្ត្រីយោធា កាលពីខែមុន។

មន្ត្រីខាងលើនេះ បាននិយាយយ៉ាងដូច្នេះថា «យើងទទួលបានភ្លើងខៀវ ដើម្បីទិញឧបករណ៍យោធាថ្មីៗ រួមមានដូចជា យន្តហោះចម្បាំង ដ្រូន រថក្រោះធន់ស្រាល ប្រព័ន្ធរ៉ាដា នាវាចម្បាំង និងនាវាមុជទឹក សម្រាប់ជំរុញសមត្ថភាពការពារជាតិរបស់យើង»។

ជាមួយគ្នានេះ មេទ័ពជាន់ខ្ពស់ម្នាក់ទៀតរបស់ហ្វីលីពីន បាននិយាយប្រាប់សារព័ត៌មាន Reuters ថា លោកប្រធានាធិបតីបានយល់ព្រមលើគម្រោងទំនើបកម្មចំនួន៣៣ ដែលផ្ដោតសំខាន់ទៅលើសន្តិសុខក្នុងស្រុក និងការការពារព្រំដែនទឹករបស់ហ្វីលីពីន។

គួររម្លឹកថា រដ្ឋបាលរបស់អតីតប្រធានាធិបតីហ្វីលីពីន លោក Benigno Aquino III បានចំណាយប្រាក់ប្រមាណ ១,៧ពាន់លានដុល្លារសម្រាប់ធ្វើទំនើបកម្មយោធា អំឡុងអាណត្តិរបស់លោកឆ្នាំ២០១០-២០១៦ ដែលភាគច្រើនចំណាយលើនាវា និងយន្តហោះចម្បាំងមួយទឹក៕

ប្រភព៖ Reuters ប្រែសម្រួល៖ អឹុម ម៉េងស៊ាង