ត្រាំ៖ កូរ៉េខាងជើង បានបញ្ជូនអដ្ឋិធាតុទាហានអាមេរិកចំនួន២០០ មកវិញ

2018-06-21 10:02:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃទី២០ មិថុនាម្សិលមិញថា កូរ៉េខាងជើង បានប្រគល់អដ្ឋិធាតុទាហានអាមេរិកចំនួន ២០០ ដែលបានស្លាប់ក្នុងសង្គ្រាមកូរ៉េ ទៅឲ្យសហរដ្ឋអាមេរិកវិញ។ ការលើកឡើងរបស់លោកដូណាល់ ត្រាំនេះ បានធ្វើឡើងអំឡុងជំនួបជាមួយអ្នកគាំទ្រ ក្នុងទីក្រុង Duluth រដ្ឋ Minnesota សហរដ្ឋអាមេរិក។

លោក ដូណាល់ ត្រាំ ថ្លែងនាពេលកន្លងមក

ជាមួយគ្នានេះ មន្ត្រីអាមេរិកមួយរូបបាននិយាយកាលពីថ្ងៃទី១៩ មិថុនាថា ប៉ុន្មានថ្ងៃខាងមុខទៀត រដ្ឋាភិបាលទីក្រុងព្យុងយ៉ាងនឹងប្រគល់អដ្ឋិធាតុមួយចំនួនធំទៅឲ្យបញ្ជាការដ្ឋានអាមេរិក នៅក្នុងប្រទេសកូរ៉េខាងត្បូង និងត្រៀមបញ្ជូនទៅកាន់មូលដ្ឋានទ័ពអាកាសអាមេរិក Hickam នៅក្នុងកោះហាវ៉ៃ។

គួរបញ្ជាក់ថា ការយល់ព្រមបញ្ជូនអដ្ឋិធាតុកងទ័ពអាមេរិកទៅឲ្យទីក្រុងវ៉ាស៊ីនតោនវិញ គឺជាចំណុចសំខាន់មួយនៃកិច្ចព្រមព្រៀង ដែលត្រូវបានចុះហត្ថលេខារវាងលោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន អំឡុងជំនួបកំពូលនៅសិង្ហបុរី កាលពីថ្ងៃទី១២ មិថុនាកន្លងទៅ។

គួររម្លឹកថា ទាហានអាមេរិកប្រមាណជាង ៧៧០០នាក់ បានបាត់ខ្លួន និងប្រមាណជាង៣៦៥០០ នាក់ទៀតបានស្លាប់ នៅក្នុងសង្គ្រាមកូរ៉េ ចន្លោះឆ្នាំ១៩៥០-១៩៥៣។ នេះបើតាមទិន្នន័យរបស់ក្រសួងការពារជាតិអាមេរិក៕