កម្ពុជា-ថៃ នឹងធ្វើសមយុទ្ធរួមគ្នាជាថ្មីឡើងវិញ ក្រោយផ្អាកអស់ ៧ឆ្នាំ

2018-06-25 03:37:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Thanchaiyan Srisuwan មេបញ្ជាការកំពូលកងទ័ពថៃ បានប្រាប់តាមរយៈសារព័ត៌មានក្នុងស្រុក Bangkok Post ថា កម្ពុជានឹងបញ្ជូនកងយោធា និងប៉ូលិសចំនួន ២៥រូប ចូលរួមក្នុងសកម្មភាពហ្វឹកហាត់លំដាប់ VIP និងសមយុទ្ធរួមគ្នាមួយ នៅក្នុងខេត្ត Chachoengsao នៃប្រទេសថៃ។

សកម្មភាពហ្វឹកហាត់ នឹងផ្ដោតសំខាន់ទៅលើការការពារឥស្សរជនពីការវាយប្រហារដោយគ្រាប់កាំភ្លើង ឯសមយុទ្ធវិញនឹងធ្វើឡើងពាក់ព័ន្ធនឹងជំនួយមនុស្សជាតិ ព្រមទាំងការដោះស្រាយគ្រោះមហន្តរាយ ដែលកើតឡើងនៅតាមបន្ទាត់ព្រំដែនប្រទេសទាំង២។

កងកម្លាំងប្រទេសថៃ (រូបតំណាង)/ រូបភាព៖ AP

លោក Srisuwan បានបញ្ជាក់ថា លំហាត់កងយោធា និងប៉ូលិសរួមគ្នានេះ ត្រូវបានផ្អាកអស់រយៈពេល ៧ឆ្នាំមកហើយ ក្រោយពីប្រទេសទាំង២កើតមានជម្លោះនឹងគ្នាជុំវិញរឿងប្រាសាទព្រះវិហារ កាលពីឆ្នាំ២០១១កន្លងទៅ។ លោកមេបញ្ជាការថៃបានរៀបរាប់បន្តថា ការចាប់ផ្ដើមនូវវគ្គហ្វឹកហាត់ និងសមយុទ្ធរួមគ្នានេះ នឹងក្លាយចំណងចងភ្ជាប់ទំនាក់ទំនងរវាងកងកម្លាំងកម្ពុជា-ថៃជាថ្មីឡើងវិញ។

សូមបញ្ជាក់ថា ចំពោះកាលបរិច្ឆេទនៃការហ្វឹកហាត់ និងសមយុទ្ធកម្ពុជា-ថៃ នៅមិនទាន់មានការបញ្ជាក់ផ្លូវការនៅឡើយទេ៕

ប្រភព៖ Bangkokpost ប្រែសម្រួល៖ ឈាង.