EU ផ្តល់ជំនួយជាង ៤លានដុល្លារបន្ថែមទៀត ឲ្យសាលាក្តីខ្មែរក្រហម

2018-06-25 04:45:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហភាពអឺរ៉ុប បានប្រកាសផ្តល់ជំនួយ ៣,៥ លានអឺរ៉ូ(ជាង ៤ លានដុល្លារអាមេរិក) ដល់អង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) ដើម្បីគាំទ្រដល់ដំណើរការរបស់សាលាក្តីនេះ សម្រាប់ឆ្នាំ២០១៨។ ក្នុងនោះទឹកប្រាក់ប្រមាណ ២,២៥ លានអឺរ៉ូ(ជាង ២,៦២ លានដុល្លារអាមេរិក) នឹងផ្តល់ជូនដល់ភាគីអន្តរជាតិ និង ១,២៥ លានអឺរ៉ូ(ជាង ១,៤៥ លានដុល្លារអាមេរិក)ទៀត នឹងផ្តល់ជូនដល់ភាគីជាតិ។ នេះបើតាមសេចក្តីប្រកាសព័ត៌មានរបស់សហអឺរ៉ុប នៅថ្ងៃទី ២៥ មិថុនា ឆ្នាំ២០១៨នេះ។

អ្នកចូលរួម កំពុងតាមដានការកាត់ក្តីមេដឹកនាំខ្មែរក្រហម នៅ អ.វ.ត.ក នាពេលកន្លងមក

ប្រធានការិយាល័យរដ្ឋបាលស្តីទី លោក ក្រាញ់ តូនី និងអនុប្រធានការិយាល័យរដ្ឋបាលអ.វ.ត.ក លោក Knut Rosandhaug បានថ្លែងនៅក្នុងសេចក្ដីថ្លែងការណ៍រួមគ្នាថា «ការគាំទ្រផ្នែកហិរញ្ញវត្ថុនេះ នឹងរួមចំណែកបន្តនិរន្តរភាពរបស់សាលាក្តី ដើម្បីសម្រេចបានយុត្តិធម៌ចំពោះអំពើឃោរឃៅនៃរបបកម្ពុជាប្រជាធិបតេយ្យ ចន្លោះឆ្នាំ១៩៧៥ ដល់ឆ្នាំ១៩៧៩។»

គួរបញ្ជាក់ថា សហភាពអឺរ៉ុប គឺជាម្ចាស់ជំនួយធំមួយ ក្នុងចំណោមម្ចាស់ជំនួយធំៗបំផុតរបស់សាលាក្តីខ្មែរក្រហម ហើយការផ្ដល់ជំនួយចុងក្រោយនេះ ធ្វើឲ្យជំនួយហិរញ្ញវត្ថុដែលសហភាពអឺរ៉ុបបានផ្តល់ដល់ សាលាក្តីខ្មែរក្រហម មានចំនួនសរុប ២២,៧០ លានអឺរ៉ូ(ជាង ២៦,៤៥ លានដុល្លារអាមេរិក) គិតចាប់ពីសាលាក្តីនេះ ចាប់កំណើតនៅឆ្នាំ២០០៦មក៕

អត្ថបទ៖ អឹុម ម៉េងស៊ាង