ស្អែកនេះ ប្រមុខការពារជាតិអាមេរិកធ្វើទស្សនកិច្ចទៅកាន់ក្រុងប៉េកាំង

2018-06-25 06:52:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក James Mattis រដ្ឋមន្រ្តីក្រសួងការពារជាតិអាមេរិក នឹងធ្វើទស្សនកិច្ចទៅកាន់ប្រទេសចិន រយៈពេល ៣ថ្ងៃ ពីថ្ងៃទី២៦ ដល់ ២៨ ខែមិថុនា ២០១៨។ នេះបើតាមការបញ្ជាក់របស់ក្រសួងការបរទេសចិន នៅថ្ងៃទី២៥ ខែមិថុនា ២០១៨នេះ។

លោក James Mattis រដ្ឋមន្រ្តីក្រសួងការពារអាមេរិក (រូបភាព៖ DNA India)

លោក Ren Guoqiang អ្នកនាំពាក្យក្រសួងការពារជាតិចិនបានបញ្ជាក់ថា អំឡុងទស្សនកិច្ចនេះ ប្រមុខការពារជាតិអាមេរិកនឹងជួបមន្រ្តីជាន់ខ្ពស់ចិនមួយចំនួន។ អំឡុងជំនួបនេះ ភាគីទាំងពីរនឹងធ្វើការផ្លាស់ប្ដូរយោបល់គ្នាលើបញ្ហា ដែលបង្កការព្រួយបារម្ភរវាងភាគីទាំងពីរ។ អ្នកនាំពាក្យរូបនេះបន្ថែមថា ទំនាក់ទំនងរវាងចិន និងអាមេរិក មានសារៈសំខាន់ចំពោះផលប្រយោជន៍នៃប្រទេសទាំងពីរ និងមូលដ្ឋានគ្រឹះនៃទំនាក់ទំនងទ្វេភាគី។

ទស្សនកិច្ចនេះ នឹងធ្វើឲ្យលោក James Mattis ក្លាយជារដ្ឋមន្ត្រីការពារជាតិអាមេរិកទី១ ដែលធ្វើទស្សនកិច្ចទៅកាន់ទឹកដីចិន ចាប់តាំងពីឆ្នាំ២០១៤ មក។ សម្រាប់ទស្សនកិច្ចនេះ បញ្ហាកូរ៉េខាងជើងក៏ត្រូវរំពឹងថា លើកយកមកពិភាក្សាផងដែរ។

បន្ទាប់ពីបញ្ចប់ទស្សនកិច្ចនៅក្រុងប៉េកាំង លោក James Mattis នឹងបន្តទស្សនកិច្ចទៅកាន់ប្រទេសកូរ៉េខាងត្បូង និងប្រទេសជប៉ុន ដោយលោកនឹងជួបពិភាក្សាជាមួយសមភាគីរបស់លោក គឺលោក Song Young-moo និងលោក Itsunori Onodera ជាបន្តទៀត៕

ប្រភព៖ CGTN ប្រែសម្រួល៖ វាសនា