រាជរដ្ឋាភិបាល ធ្វើប្លង់រឹងបានជាង ១៥ម៉ឺន លើ ២២ម៉ឺនក្បាលដី ក្នុងរាជធានីភ្នំពេញ

2018-06-25 12:56:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងរៀបចំដែនដី និងរដ្ឋបាលដីធ្លីរាជធានីភ្នំពេញ បានចាប់ផ្តើមនៅខែតុលា ឆ្នាំ២០០៣ រហូតមកដល់បច្ចុប្បន្ន ដោយបានចុះបញ្ជីដីធ្លីបាន ៦០សង្កាត់ ក្នុងរាជធានីភ្នំពេញ។ ក្នុងនោះ រាជរដ្ឋាភិបាល បានផ្តល់បណ្ណកម្មសិទ្ធិ ឬប្លង់រឹង ជូនប្រជាពលរដ្ឋរស់នៅក្នុងរាជធានីភ្នំពេញ មានប្រមាណជាង ១៥ ម៉ឺនក្បាលដី ក្នុងគម្រោងទិន្នន័យសរុបជាង ២២ ម៉ឺនក្បាលដី។ នេះបើតាមរបាយការណ៍របស់សាលារាជធានីភ្នំពេញ ដែលត្រូវបានបង្ហាញក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ ឬប្លង់រឹង ជូនប្រជាពលរដ្ឋ ៥៥៤ គ្រួសារ កាលពីព្រឹកថ្ងៃទី២៥ ខែមិថុនា ឆ្នាំ២០១៨។

ប្រជាពលរដ្ឋទាំង ៥៥៤គ្រួសារ គឺរស់នៅក្នុងភូមិ១១,១២,១៣ សង្កាត់ស្រះចក ភូមិ១០ សង្កាត់វត្តភ្នំ និងភូមិ១២ សង្កាត់ផ្សារថ្មីទី៣ ក្នុងខណ្ឌដូនពេញ រាជធានីភ្នំពេញ ដោយមានចំនួនសរុប ៥៥៤បណ្ណ។

ប្រជាពលរដ្ឋ ក្នុងខណ្ឌដូនពេញ ចូលរួមក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ កាលពីព្រឹកថ្ងៃទី២៥ ខែមិថុនា ឆ្នាំ២០១៨។ រូបថត៖ រដ្ឋបាលរាជធានីភ្នំពេញ

លោក ឃួង ស្រេង អភិបាលរាជធានីភ្នំពេញ បានលើកឡើងថា ការផ្តល់វិញ្ញាបនបត្រ សម្គាល់ម្ចាស់អចលនវត្ថុ គឺជាយុទ្ធសាស្រ្តរបស់រាជរដ្ឋាភិបាលលើវិស័យដីធ្លី ដោយធ្វើយ៉ាងណា ឱ្យប្រជាពលរដ្ឋគ្រប់គ្នា ទទួលបាននូវបណ្ណកម្មសិទ្ធដីធ្លី។

លោកបញ្ជាក់ថា ចំពោះការយឺតយ៉ាវក្នុងការផ្តល់វិញ្ញាបនបត្រសម្គាល់ម្ចាស់អចលនវត្ថុ ដល់ប្រជាពលរដ្ឋ ៥៥៤ គ្រួសារនាពេលនេះ ដោយសារប្រជាពលរដ្ឋ បានរស់នៅ លើដីកម្មសិទ្ធិរបស់រដ្ឋ ដោយត្រូវរង់ចាំការអនុញ្ញាតពីរាជរដ្ឋាភិបាល ដើម្បីធ្វើសម្បទានជូនជាមុនសិន៕

អត្ថបទ៖ លីហៀង