ប៉ូលិស រឹបអូសលុយ របស់របរគ្រួសារ Najib ជាង២៧០លានដុល្លារ

2018-06-27 08:41:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប៉ូលិសម៉ាឡេស៊ី បានឲ្យដឹងថា លុយ គ្រឿងអលង្ការ កាបូប នាឡិកា និងរបស់របរផ្សេងៗទៀត ដែលត្រូវបានរឹបអូសពីលំនៅឋានរបស់លោក Najib Razak អតីតនាយករដ្ឋមន្ត្រីម៉ាឡេស៊ី មានតម្លៃសរុបចំនួនជាង ២៧០លានដុល្លារអាមេរិក។

កាបូបជាច្រើន ត្រូវបានប៉ូលិសម៉ាឡេស៊ី រឹបអូស ពីលំនៅឋានរបស់លោក Najib (រូបថត៖ AP)

លោក Datuk Seri Amar Singh ប្រធានផ្នែកឧក្រិដ្ឋកម្មពាណិជ្ជកម្មម៉ាឡេស៊ី បានប្រាប់នៅថ្ងៃពុធ ទី២៧ ខែមិថុនា ឆ្នាំ២០១៨នេះថា ទ្រព្យសម្បត្តិខាងលើ ត្រូវបានរឹបអូសពីលំនៅឋាន ៦ ដែលមានជាប់ទាក់ទងនឹងលោក Najib ។

លោកបន្តថា របស់ដែលមានតម្លៃខ្ពស់ជាងគេ ក្នុងការរឹបអូសនេះ គឺគ្រឿងអលង្ការ ដែលមានតម្លៃជិត ២២០លានដុល្លារ ហើយរបស់ដែលមានតម្លៃខ្ពស់បំផុតគឺ ខ្សែ ក ពេជ្រ ១ខ្សែ ដែលមានតម្លៃ ១,៥៩លានដុល្លារ។ លើសពីនេះ ប៉ូលិស ក៏បានរឹបអូសនាឡិកាជាង ៤២០គ្រឿង តម្លៃជិត ២០លានដុល្លារ កាបូបជិត ៥៧០ (៣៧ម៉ាកផ្សេងៗគ្នា) ផងដែរ។

ប្រធានផ្នែកឧក្រិដ្ឋកម្មពាណិជ្ជកម្មម៉ាឡេស៊ីបានបន្តថា ក្រុមការងាររបស់លោកចំនួន ២២នាក់ និងម៉ាស៊ីនរាប់លុយ ៣គ្រឿង ត្រូវបានប្រើប្រាស់ដើម្បីបូកសរុបតម្លៃទ្រព្យសម្បត្តិដែលត្រូវបានរឹបអូស ដោយប្រើពេលរាប់ចំនួន ៣ថ្ងៃ។ លោកបន្ថែមថា លុយជិត ៣០លានដុល្លារ ជារូបិយបណ្ណបរទេស ចំនួន ២៦ប្រភេទផ្សេងៗគ្នា។

សូមជម្រាបថា អាជ្ញាធរកំពុងស៊ើបអង្កេតលោក Najib ពាក់ព័ន្ធនឹងរឿងអាស្រូវ 1MDB ដែលបង្កើតឡើងដោយអតីតនាយករដ្ឋមន្ត្រីម៉ាឡេស៊ីនេះ។

ចាប់ពីខែឧសភាក្រោយចាញ់ឆ្នោត លោក Najib ត្រូវបានម៉ាឡេស៊ីដាក់ក្នុងបញ្ជីខ្មៅ មិនឲ្យចាកចេញពីប្រទេសឡើយ។ មិនតែប៉ុណ្ណោះ អង្គភាពប្រឆាំងអំពើពុករលួយ ធ្លាប់បានកោះហៅលោក Najib ឲ្យចូលបំភ្លឺពាក់ព័ន្ធនឹងរឿងអាស្រូវនោះ៕

អត្ថបទទាក់ទង

ប្រភព៖ Aljazeera ប្រែសម្រួល៖ លាភ.