អាជ្ញាធរ ស្នើឱ្យបញ្ចៀសការធ្វើចរាចរណ៍ចេញចូលរាជធានី នៅម្តុំស្ពានផ្សារដីហុយ នាថ្ងៃ២កក្កដា
- 2018-06-29 13:32:27
- ចំនួនមតិ 0 | ចំនួនចែករំលែក 0
អាជ្ញាធរ ស្នើឱ្យបញ្ចៀសការធ្វើចរាចរណ៍ចេញចូលរាជធានី នៅម្តុំស្ពានផ្សារដីហុយ នាថ្ងៃ២កក្កដា
ចន្លោះមិនឃើញ
រដ្ឋបាលរាជធានីភ្នំពេញ នៅថ្ងៃទី២៩ ខែមិថុនា ឆ្នាំ២០១៨នេះ បានស្នើឱ្យបញ្ចៀសការធ្វើចរាចរណ៍ ចេញចូលរាជធានីនៅចំណុចស្ពានអាកាសមិត្តភាពកម្ពុជា-ចិនសែនសុខ (ស្ពានស្តុបផ្សារដីហុយ) នៅថ្ងៃទី២ ខែកក្កដា ឆ្នាំ២០១៨ខាងមុខនេះ។ ការអំពាវនាវនេះ គឺដោយសារតែស្ពាននេះ នឹងត្រូវធ្វើពិធីសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពសម្តេចនាយករដ្ឋមន្រ្តី ហ៊ុន សែន។ ពិធីនេះ នឹងធ្វើឡើងចាប់ពីម៉ោង ៦ព្រឹក ដល់ម៉ោង ១២ថ្ងៃត្រង់ ដោយមានអ្នកចូលរួមជាង ១ម៉ឺននាក់។
១. ចំពោះអ្នកធ្វើដំណើរមកពីទិសខាងលិច តាមបណ្តោយមហាវិថីសហព័ន្ធរុស្ស៊ី ពីព្រលានយន្តហោះចូលរាជធានី ត្រូវពង្វាងផ្លូវ ទៅផ្លូវលេខ២០០៤ បត់ស្តាំទៅទិសខាងត្បូង ឬផ្លូវលេខ២០១១ បត់ឆ្វេងទៅទិសខាងជើង ឬបត់ស្តាំទៅទិសខាងត្បូង តាមផ្លូវបេតុង ឆ្ពោះទៅវត្តអង្គតាមិញ។
២. ចំពោះអ្នកធ្វើដំណើរតាមបណ្តោយសហព័ន្ធរុស្ស៊ី ទិសដៅចេញក្រៅរាជធានីភ្នំពេញ ត្រូវពង្វាងផ្លូវ ដោយបត់ឆ្វេងក្រោមស្ពានអាកាស ចូលផ្លូវណ័រប្រ៊ីត ឬបត់ស្តាំត្រង់ចំណុចក្រោមស្ពានអាកាស ទៅមហាវិថីមិត្តភាពភ្នំពេញ-ហាណូយ។
៣. ចំពោះអ្នកធ្វើដំណើរពីខាងជើង ទៅទិសខាងត្បូង និងពីទិសខាងត្បូង ទៅទិសខាងជើងតាមមហាវិថីមិត្តភាពភ្នំពេញ-ហាណូយ និងផ្លូវលេខ១០១៩ (ណ័រប្រ៊ីត) ត្រង់ចំណុចក្រោមស្ពានអាកាសនេះ គឺអាជ្ញាធរអនុញ្ញាតឱ្យធ្វើចរាចរណ៍ជាម្មតា៕