សារព័ត៌មានខ្មែរ ចាប់អារម្មណ៍រឿង "បាតដៃខ្មៅ"
- 2018-07-03 03:43:39
- ចំនួនមតិ 0 | ចំនួនចែករំលែក 0
សារព័ត៌មានខ្មែរ ចាប់អារម្មណ៍រឿង "បាតដៃខ្មៅ"
ចន្លោះមិនឃើញ
សារព័ត៌មានធំៗជាច្រើន បានងាកមកចាប់អារម្មណ៍ខ្សែភាពយន្តខ្មែរ រឿង "បាតដៃខ្មៅ" ដែលកំពុងចាក់បញ្ចាំង នៅតាមរោងភាពយន្តនានា។
កាសែតរស្មីកម្ពុជា បានដាក់ចំណងជើងថា៖ "Sabay បញ្ចេញភាពយន្តដ៏ទាក់ទាញ គឺរឿង បាតដៃខ្មៅ"។ កាសែតវ័យចំណាស់មួយនេះ បានសរសេរថា ខ្សែភាពយន្តខ្នាតធំ រឿង បាតដៃខ្មៅ របស់ក្រុមហ៊ុន Sabay សហការជាមួយ Studio 4 ត្រូវបានសម្ពោធដាក់បញ្ចាំងជាផ្លូវការហើយ កាលពីថ្ងៃទី២៦ មិថុនា ២០១៨ ក្រោយបញ្ចប់ការផលិតយ៉ាងយកចិត្តទុកដាក់ពីសំណាក់អ្នកដឹកនាំរឿង និងតួសម្ដែងវ័យក្មេង ដែលពោរពេញដោយសមត្ថភាព និងទេពកោសល្យ។
ចំណែកវិបសាយ កោះតារា របស់សារព័ត៌មានកោះសន្តិភាព ក៏បានចាប់អារម្មណ៍លើខ្សែភាពយន្តនេះផងដែរ។ កោះតារា បានដាក់ចំណងជើងថា "រឿងបាតដៃខ្មៅ បង្កប់អរូបិយជ្រាលជ្រៅជាងអ្វីដែលអ្នកធ្លាប់ដឹង!"។ វិបសាយនេះ បានសរសេរថា បាតដៃខ្មៅ បានបង្ហាញពីអបិយជំនឿប្លែកៗ របស់ប្រជាជននៅតំបន់ ភូមិភាគឥសានដូចជាប្រពៃណីរំដោះគ្រោះហៅវិញ្ញាណកាប់ក្របី សែនជាដើម។
សារព័ត៌មានដើមអំពិល ឯណោះវិញ បានដាក់ចំណងជើងថា "ខ្សែភាពយន្តខ្មែខ្នាតធំ រឿង «បាតដៃខ្មៅ»របស់ក្រុមហ៊ុន Sabay សម្ពោធដាក់បញ្ចាំង ជាផ្លូវការហើយ"។ សារព័ត៌មានអនឡាញដ៏ល្បីនេះ បានស្រង់សម្ដីលោក មាស រស្មី អ្នកដឹកនាំរឿង បាតដៃខ្មៅ ថារឿងនេះ លោកបានចំណាយ ពេលជាងមួយភាគ បីនៃ គម្រោងទៅលើការសរសេរអត្ថបទរឿង ដោយត្រូវសម្រួលពីប្រលោម លោក ដែលសរសេរ សម្រាប់ការស្រមៃ មកជាអត្ថបទរឿងដែលសរសេរសម្រាប់ការថតជារូបភាព និងសំឡេង។ មិនតែប៉ុណ្ណោះលោកក៏បានចំណាយពេលចុះទៅដល់ខេត្តដែលសាច់រឿងដើមបាននិយាយ ដូចជាតាកែវ ស្ទឹងត្រែងជាដើម ។
វិបសាយសារព័ត៌មានថ្មីៗ បានចាប់អារម្មណ៍ទៅលើអ្នកនិពន្ធរឿង បាតដៃខ្មៅ គឺអ្នកស្រី ម៉ីសន សុធារី។ សារព័ត៌មានអនឡាញមួយនេះ បានស្រង់សម្ដីរបស់អ្នកស្រី មីសន សុធារីថា៖ "រឿង«បាតដៃខ្មៅ» និពន្ធឡើងដើម្បីផ្ដល់សារអប់រំទៅដល់យុវវ័យសម័យថ្មីឲ្យចេះសាមគ្គីគ្នា និងចេះស្វែងយល់ពីដើមហេតុនៃបញ្ហា មករួមគ្នាដោះស្រាយ។ រឿងនេះក៏បញ្ចូលបញ្ហាដែលភ្ជាប់ទំនាក់ទំនងជាមួយជំនឿអរូបិយខ្មែរផងដែរ ដើម្បីកុំឲ្យយុវវ័យមានការប្រមាថពេលទៅតំបន់ឆ្ងាយពីភូមិស្រុករបស់ខ្លួន"។
Biz Khmer បានចាប់អារម្មណ៍ទៅលើ លោក ជី សិលា នាយកប្រតិបត្តិក្រុមហ៊ុន Sabay ដែលជាក្រុមហ៊ុនវិនិយោគលើការផលិតរឿង បាតដៃខ្មៅ។ វិបសាយព័ត៌មានពាណិជ្ជកម្មមួយនេះ បានស្រង់សម្ដីលោក ជី សិលា ថាការវិនិយោគរឿង “បាតដៃខ្មៅ” គ្រាន់តែជាការចាប់ផ្តើមរបស់ Sabay លើវិស័យភាពយន្តខ្មែរប៉ុណ្ណោះ មិនមែនជាកត្តាវាស់វែងផែនការអនាគតនោះទេ ដូច្នេះទោះរឿងនេះជោគជ័យ ឬអត់ Sabay នៅតែវិនិយោគកុនទម្រង់ថ្មីៗ ជាបន្តទៀត។ ភាពយន្តធំបន្ទាប់ទៀត ទំនងជាផ្តើមប្រតិបត្តិការនៅឆមាសទីពីរឆ្នាំនេះ ហើយក្នុងទម្រង់មួយថ្មី។
សូមបញ្ជាក់ថា ខ្សែភាពយន្តខ្នាតធំ "បាតដៃខ្មៅ" ត្រូវបានសម្ពោធកាលពីថ្ងៃទី២៦ មិថុនា និងចាប់ផ្ដើមបញ្ចប់ ចាប់ពីថ្ងៃ២៨ មិថុនារហូតមក នៅគ្រប់រោងភាពយន្តទំនើបៗ នៅរាជធានីភ្នំពេញ និងរោងភាពយន្ត Major Cineplex by Smart ខេត្តសៀមរាប។ ខ្សែភាពយន្តថ្មីនេះ ប្រមូលម្តុំដោយតារាល្បីៗ ដូច Sai ខាំ ជេន ម៉ានិត ជន រតនៈ រួមទាំង ចែ ឡេង និងយុជនវ័យក្មេង ហេង ចន្ទតារាវិត ជាដើម៕