ផ្លូវដែកកំណាត់ចុងក្រោយ ពោធិ៍សាត់-ភ្នំពេញ ត្រូវបានដាក់ឱ្យដំណើរការហើយព្រឹកនេះ

2018-07-04 01:30:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវដែកកំណាត់ចុងក្រោយ ពោធិ៍សាត់-ភ្នំពេញ ប្រវែង ១៦៦គីឡូម៉ែត្រ ត្រូវបានដាក់ឱ្យដំណើរការហើយនៅព្រឹកថ្ងៃទី៤ ខែកក្កដា ឆ្នាំ២០១៨នេះ ក្រោមអធិបតីភាពលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។

សូមបញ្ជាក់ថា ការតភ្ជាប់កំណាត់ផ្លូវរថភ្លើងចុងក្រោយនេះ គឺជាផ្នែកមួយនៃគម្រោងស្ដារឡើងវិញនូវផ្លូវដែកប៉ែកខាងជើងរបស់កម្ពុជា ពីភ្នំពេញ ទៅប៉ោយប៉ែត ដែលមានប្រវែងសរុប ៣៨៦គីឡូម៉ែត្រ។ ក្នុងនោះកំណាត់ផ្លូវដែកចំនួន៣ ត្រូវបានដាក់ឱ្យដំណើរការរួចមកហើយ រួមមាន៖

១. ប៉ោយប៉ែត-សិរីសោភ័ណ ប្រវែង ៤៨គីឡូម៉ែត្រ ដាក់ដំណើរការនៅថ្ងៃទី៤ មេសា ២០១៨

២. សិរីសោភ័ណ-បាត់ដំបង ប្រវែង ៦៥គីឡូម៉ែត្រ ដាក់ដំណើរការនៅថ្ងៃទី២៩ មេសា ២០១៨

៣. បាត់ដំបង-ពោធិ៍សាត់ ប្រវែង ១០៧គីឡូម៉ែត្រ ដាក់ដំណើរការនៅថ្ងៃទី២៩ ឧសភា ២០១៨។

រថភ្លើងនៅស្ថានីយប៉ោយប៉ែត

លោក ស៊ុន ចាន់ថុល បានថែ្លងបញ្ជាក់ក្នុងពិធីនេះថា ចាប់ពីថ្ងៃទី៤កក្កដានេះតទៅ ប្រជាពលរដ្ឋអាចធ្វើដំណើរតាមរថភ្លើងទៅមក ភ្នំពេញ-ប៉ោយប៉ែត ដោយឥតគិតថ្លៃរហូតដល់ថ្ងៃទី១ ខែសីហា ឆ្នាំ២០១៨ ដោយរថភ្លើងនេះ អាចរត់ក្នុងល្បឿនពី ៣០ ទៅ ៤០គីឡូម៉ែត្រក្នុង១ម៉ោង៕

អត្ថបទ៖ សំភី