កម្ពុជា-ADB ចុះកិច្ចព្រមព្រៀងលើគម្រោងចំនួន២ តម្លៃជិត ២០០លានដុល្លារ

2018-07-06 06:15:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី៦ ខែកក្កដា ឆ្នាំ២០១៨នេះ ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការសម្រាប់គម្រោងចំនួន២ ដែលមានទឹកប្រាក់សរុប ១៩០លានដុល្លារ។ ការចុះហត្ថលេខានេះ ធ្វើឡើងដោយលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោក Hldeakl Iwasak នាយកស្តីទីស្ថានតំណាង ADB ប្រចាំកម្ពុជា នៅទីស្តីការក្រសួង។

ពិធីចុះហត្ថលេខាលើគម្រោងចំនួន២ ដែលមានទឹកប្រាក់ជិត ២០០លានដុល្លារ នាព្រឹកថ្ងៃទី៦កក្កដា ២០១៨ នៅទីស្តីការក្រសួងសេដ្ឋកិច្ច និងហិរញ្ញវត្ថុ។ រូបថត៖ ក្រសួងសេដ្ឋកិច្ច

សេចក្តីប្រកាសព័ត៌មានរបស់ក្រសួងសេដ្ឋកិច្ច បានឱ្យដឹងថា គម្រោងទាំង២នេះ រួមមាន៖

១. គម្រោងខ្សែច្រវ៉ាក់ផលិតកម្មប្រកបដោយភាតរៈបរិស្ថាន៖ គ្រោងចំណាយថវិកាសរុបចំនួន ១៤១,០៤លានដុល្លារ សម្រាប់គាំទ្រដល់ការបង្កើនប្រាក់ចំណូលដល់ប្រជាជនតាមជនបទ និងជំរុញនូវការប្រកួតប្រជែងនៃច្រវ៉ាក់ផលិតកម្មកសិកម្ម ស្របតាមផែនការយុទ្ធសាស្រ្តអភិវឌ្ឍន៍វិស័យកសិកម្ម ២០១៤-២០១៨, គោលនយោបាយរបស់រាជរដ្ឋាភិបាលស្តីពី "ការជំរុញផលិតកម្មដំណាំស្រូវ និងការនាំចេញអង្ករ" និងគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥។

២. គម្រោងកែលម្អផ្លូវជនបទជំហានទី៣៖ គ្រោងចំណាយថវិកាសរុបចំនួន ៦៦លានដុល្លារ សម្រាប់ធ្វើការកែលម្អបន្ថែមផ្លូវជនបទ ដោយក្រាលកៅស៊ូ ២ជាន់ (DBST) និងបេតុង ដែលមានចំនួន ២២ខ្សែ ប្រវែងសរុបប្រមាណ ៣៥៩,៨គីឡូម៉ែត្រ ស្ថិតក្នុងខេត្តគោលដៅចំនួន ៥ រួមមាន កំពង់ចាម ត្បូងឃ្មុំ ព្រៃវែង ស្វាយរៀង និងក្រចេះ។ គម្រោងនេះ ក៏នឹងចូលរួមចំណែកក្នុងការអនុវត្តគោលនយោបាយអភិវឌ្ឍន៍ជនបទ រួមមានការធានាលើកកម្ពស់កម្រិតជីវភាពរស់នៅរបស់ប្រជាពលរដ្ឋជនបទ ឱ្យមានគម្លាតខិតជិតទីប្រជុំជននៅឆ្នាំ២០២៥។

ជាមួយគ្នានេះ លោក អូន ព័ន្ធមុនីរ័ត្ន ក៏បានរំលឹកឡើងវិញផងដែរថា គិតមកដល់ពេលនេះ ADB បានផ្តល់ហិរញ្ញប្បទានសហប្រតិបត្តិការសរុបចំនួនប្រមាណ ២,៩៥ពាន់លានដុល្លារហើយ។ ក្នុងនោះ ឥណទានសម្បទានមានទឹកប្រាក់សរុបចំនួនប្រមាណ ២,៤៦ពាន់លានដុល្លារ សម្រាប់អនុវត្តកម្មវិធី/គម្រោង ចំនួន១០១ និងហិរញ្ញប្បទានឥតសំណងមានទឹកប្រាក់សរុបចំនួនប្រមាណ ៤៨៧លានដុល្លារ សម្រាប់អនុវត្តកម្មវិធី/គម្រោង ចំនួន៥១៕

អត្ថបទ៖ សំភី