ក្រុមហ៊ុនអូស្ត្រាលី ទទួលបានអាជ្ញាបណ្ណធ្វើអាជីវកម្មរ៉ែមាស នៅខេត្តមណ្ឌលគិរី

2018-07-12 03:23:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រាជរដ្ឋាភិបាលកម្ពុជា បានសម្រេចផ្តល់អាជ្ញាបណ្ណអាជីវកម្មរ៉ែមាស ដល់ក្រុមហ៊ុន Emeral Resource របស់អូស្ត្រាលី ដើម្បីឲ្យក្រុមហ៊ុននេះចាប់ផ្តើមទាញយកមាសពីអណ្តូងរ៉ែអូខ្វាវនៅខេត្តមណ្ឌលគិរី បន្ទាប់ពីការសិក្សារបស់ក្រុមហ៊ុនបានបង្ហាញពីលទ្ធផលវិជ្ជមាន។

ក្រុមហ៊ុន Emeral Resource ដែលចុះបញ្ជីក្នុងផ្សារភាគហ៊ុនអូស្រ្តាលី បានចេញផ្សាយសេចក្តីជូនដំណឹងពីការទទួលបានអាជ្ញាបណ្ណអាជីវកម្មរ៉ែមាសនេះកាលពីថ្ងៃ ១០ កក្កដា ហើយបានបញ្ជាក់ថាសិទ្ធិអាជីវកម្មនេះនឹងគ្របដណ្តប់លើផ្ទៃដី ១១,៥ ហិកតា នៃគម្រោងរ៉ែមាសរបស់ខ្លួននៅតំបន់អូខ្វាវ។

លោក Morgan Hart នាយកគ្រប់គ្រងក្រុមហ៊ុន Emeral Resource បានបញ្ជាក់នៅក្នុងសេចក្តីជូនដំណឹងរបស់ក្រុមហ៊ុនថា៖ «យើងមានសេចក្តីរីករាយយ៉ាងខ្លាំង ដែលទទួលបានសិទ្ធធ្វើអាជីវកម្មរ៉ែមាសនេះ។ វាជាសមទ្ធិផលដ៏សំខាន់មួយសម្រាប់យើងដើម្បីឈានឆ្ពោះទៅការផលិតមាសពីតំបន់រ៉ែមាសអូខ្វាវនៅចុងឆ្នាំនេះ និងបង្កើតជាការផលិតមាសឲ្យបានជាង ១០ ម៉ឺនអោនស៍ក្នុងមួយឆ្នាំ»។

យោងតាមសេចក្តីជូនដំណឹងរបស់ Emeral Resource អាជ្ញាបណ្ណធ្វើអាជីវកម្មរ៉ែមាសដែលផ្តល់ឲ្យដោយរដ្ឋាភិបាលកម្ពុជានាពេលនេះ មានសពុលភាពរយៈពេល ១៥ ឆ្នាំ ដោយក្រុមហ៊ុនមានសិទ្ធស្នើសុំបន្តសពុលភាពសារជាថ្មីពីរដង ដោយម្តងៗមានរយៈពេល ១០ ឆ្នាំ។ ក្រុមហ៊ុន Emeral Resource គឺជាក្រុមហ៊ុនមេរបស់ក្រុមហ៊ុន Renaissance Minerals ដែលជាអ្នកប្រតិបត្តិគម្រោងរ៉ែមាសអូខ្វាវនៅកម្ពុជា។ កាលពីខែ ឧសភា ឆ្នាំ ២០១៧ ក្រុមហ៊ុន Emeral Resource បានចេញផ្សាយលទ្ធផលនៃការសិក្សារបស់ខ្លួនដោយបញ្ជាក់ថាគម្រោងរ៉ែមាសអូខ្វាវមានកំណប់រ៉ែមាស ១,១៤ លានអោនស៍។ តាមរយៈទិន្នផលនេះ ក្រុមហ៊ុនរំពឹងថានឹងរកបានប្រមាណ ២២៥ លានដុល្លារតាមរយៈតម្លៃមាសនាពេលនោះគឺ ១២៥០ ដុល្លារក្នុងមួយអោនស៍។

ក្រុមការងាររបស់ក្រុមហ៊ុន Renaissance Minerals កំពុងសិក្សានៅតំបន់រ៉ែមាសក្នុងប្រទេសកម្ពុជា (រូបថត៖ វិបសាយក្រុមហ៊ុន Renaissance Minerals)

Emerald Resources ជឿជាក់ថាគម្រោងរ៉ែមាសអូរខ្វាវអាចផលិតមាសបាន ១០ម៉ឺន៦ពាន់អោនស៍ជាមធ្យមក្នុងមួយឆ្នាំសម្រាប់ប្រតិបត្តិការរយៈពេល ៧ ឆ្នាំ ហើយអាចត្រូវប្រើប្រាស់ដើមទុនប្រមាណជិត ១០០ លានដុល្លារ។

លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពលបានបញ្ជាក់ពីការផ្តល់អាជ្ញាបណ្ណអាជីវកម្មរ៉ែមាសដល់ក្រុមហ៊ុន Renaissance Minerals ដែលជាក្រុមហ៊ុនកូនរបស់ Emeral Resource នៅអូស្រ្តាលីនេះ ហើយអះអាងថាអជ្ញាបណ្ណនេះ នឹងបើកផ្លូវដល់ក្រុមហ៊ុនក្នុងការចាប់ផ្តើមកសាងហេដ្ឋារចនាសម្ព័ន្ធរបស់ខ្លួនដើម្បីឈានដល់ដំណើរការទាញយកមាសក្នុងពេលខាងមុខ។

លោកបន្តថា ជាទូទៅក្រុមហ៊ុនអាចត្រូវការពេលចន្លោះពី ១៨ ទៅ ២៤ ខែដើម្បីក៏សាងរចនាសម្ព័ន្ធរបស់ខ្លួនមុននឹងដំណើរការអាជីវកម្មបាន ដែលលោករំពឹងថាការចាប់ផ្តើមផលិតកម្មអាចចាប់ផ្តើមនៅចុងឆ្នាំ ២០១៩ ខាងមុខ។ លោក យស មុនីរ៉ាត់ មិនទាន់អាចវាយតម្លៃ ពីអត្ថប្រយោជន៍ធំប៉ុណ្ណាដែលផលិតកម្មរ៉ែមាសនេះអាចផ្តល់ឲ្យនៅឡើយ តែបញ្ជាក់ថា រដ្ឋាភិបាលកម្ពុជានឹងបានប្រយោជន៍ពីចំណូលពន្ធក្នុងអត្រាខ្ពស់ជាងផលិតកម្មធម្មតាពីផលិតកម្មនេះ និង ចំណូលមិនមែនសារពើពន្ធផ្សេងៗដូចជាចំណូលសួយសារអាករ និងចំណូលជួលផ្ទៃក្រលាផ្សេងៗ។

លោកថ្លែងថា៖ «នៅពេលដែលផលិតកម្មនេះដំណើរការ វានឹងក្លាយជាគម្រោងរ៉ែមាសទ្រង់ទ្រាយធំលើកដំបូងដែលត្រូវបានអភិវឌ្ឍនៅក្នុងប្រទេសកម្ពុជា»។

យោងតាមមន្រ្តីអ្នកនាំពាក្យដដែល គិតមកទល់ពេលនេះ ក្រសួងរ៉ែ និងថាមពលបានផ្តល់អជ្ញាបណ្ណសម្រាប់ការសិក្សារុករករ៉ែមាសនេះជាង ៥០ អជ្ញាបណ្ណហើយ ខណៈអជ្ញាបណ្ណសម្រាប់ធ្វើអាជីវកម្មរ៉ែមាស បានផ្តល់ឲ្យតែពីរប៉ុណ្ណោះបូករួមទាំងអាជ្ញាបណ្ណថ្មីនេះ៕

អត្ថបទ៖ ផាក បញ្ញា