World Cup ២ទសវត្សរ៍ចុងក្រោយ មានកីឡាករកើតនៅបារាំងច្រើនជាងគេ

2018-07-12 08:28:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមទិន្នន័យរបស់វេបសាយ RunRepeat បានឲ្យដឹងថា ក្នុងរយៈពេល២ទសវត្សរ៍ចុងក្រោយនេះ ប្រទេសបារាំង បានបណ្ដុះបណ្ដាលកីឡាករ World Cup ចំនួន ២១៦នាក់ ច្រើនជាងប្រទេសណាទាំងអស់។ បន្ទាប់ពីបារាំងគឺ ប្រេស៊ីល (១៤៨នាក់) អាល្លឺម៉ង់ (១៤៧នាក់) អាហ្សង់ទីន (១៤៤នាក់) និង អង់គ្លេស (១៣៦នាក់)។

បញ្ជីដើមកំណើតកីឡាករ World Cup ពីឆ្នាំ២០០២ ដល់ ២០១៨

ទិន្នន័យដដែលបន្តថា ក្នុង FIFA World Cup 2018 នេះ កីឡាករចំនួន ៥២នាក់ មានដើមកំណើតនៅប្រទេសបារាំង ក្នុងនោះ ២៩% កើតនៅទីក្រុងប៉ារីស។ កីឡាករក្នុងចំណោម ២៩% នេះ មានតម្លៃខ្លួនសរុបក្នុងទីផ្សារដោះដូរកីឡាករ ចំនួន ៤៨២ លានអឺរ៉ូ (ជាង ៥៦០លានដុល្លារអាមេរិក)។ យ៉ាងណាក៏ដោយ កីឡាករទាំង ៥២នាក់ មិនបានលេងឲ្យក្រុមជម្រើសជាតិបារាំងទាំងអស់នោះទេ ពោលគឺខ្លះបានទៅលេងឲ្យ ម៉ារ៉ុក ព័រទុយហ្គាល់ សេណេហ្គាល់ ទុយណេស៊ីជាដើម។

គួរជម្រាបថា ទិន្នន័យខាងលើ ត្រូវបានដកស្រង់ពីព្រឹត្តិការណ៍ World Cup គិតចាប់ពីឆ្នាំ២០០២មក ដែលមានកីឡាករសរុបចំនួន ៣៨៤០នាក់ បានចូលរួម World Cup ពីឆ្នាំ២០០២ ដល់ ២០១៨។

Mbappe អបអរជាមួយមិត្តរួមក្រុម នៅជម្រើសជាតិបារាំង (រូបថត៖ Reuters)

បើតាមវេបសាយ Vox បានចុះផ្សាយថា ដើម្បីដឹងពីមូលហេតុដែលបារាំងជាទីតាំងផលិតកីឡាករ World Cup ច្រើនជាងគេ គេត្រូវរំឭកដល់អំឡុងពាក់កណ្ដាលសតវត្សរ៍ទី២០ ដែលគ្រានោះ បារាំងកំពុងជួបការលំបាកក្នុងការស្តារប្រទេសឡើងវិញ ក្រោយសង្គ្រាមលោកលើកទី២។ ដោយសារកង្វះខាតកម្លាំងពលកម្ម បារាំងបានអនុញ្ញាតឲ្យជនអន្តោប្រវេសន៍ពីអឺរ៉ុប និងទ្វីបអាហ្វ្រិក ចូលទៅធ្វើការនៅប្រទេសរបស់ខ្លួន។ ទន្ទឹមនេះ បារាំងបានធ្វើកំណែទម្រង់វិស័យកីឡា ក្រោយទសវត្សរ៍ឆ្នាំ១៩៦០។ ប្រទេសនេះ បានបង្កើតកម្មវិធីបណ្ដុះបណ្ដាលថ្នាល ទាំងចេញពីជនជាតិដើមបារាំង និងជនអន្តោប្រវេសន៍។

កីឡាករល្បីៗរបស់បារាំង ដែលមានដើមកំណើតមិនមែនបារាំង ឬកាត់បារាំង មានដូចជា Zidane, Patrick Viera, Paul Pogba, Kylian Mbappe និងកីឡាករជាច្រើនទៀត៕