LDP ទាមទារឲ្យ គ.ជ.ប កំណត់យកតែសន្លឹកឆ្នោតដែលមានសញ្ញា "ធីក" ឬសញ្ញាប្រហាក់ប្រហែល

2018-07-19 06:42:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកខឹម វាសនា បានប្រកាសថា គណបក្សសម្ព័ន្ធដើម្បីប្រជាធិបតេយ្យ (LDP) ប្រកាន់ជំហរ និងទាមទារឲ្យមានការកំណត់យកសន្លឹកឆ្នោតដែលគូសសញ្ញា "ធីក" ឬសញ្ញាប្រហាក់ប្រហែល នៅក្នុងប្រអប់រាងបួនជ្រុងទ្រវែង "តូច"។

ប្រមុខគណបក្សសម្ព័ន្ធដើម្បីប្រជាធិបតេយ្យ (LDP) បានបញ្ជាក់យ៉ាងដូច្នេះ នៅក្នុងសន្និសីទសារព័ត៌មាន ស្ដីពីជំហររបស់ LDP ចំពោះការបោះឆ្នោតជ្រើសតាំងតំណាងរាស្រ្ដ នីតិកាលទី៦ ឆ្នាំ២០១៨ នៅវិមានពិភពថ្មីសែនសុខ នាព្រឹកថ្ងៃទី១៩ ខែកក្កដានេះ។

លោកខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ នៅក្នុងសន្និសីទសារព័ត៌មាន នាថ្ងៃទី១៩ ខែកក្កដានេះ

លោក ខឹម វាសនា បានថ្លែងថា៖ ***"សម្រាប់គណបក្សសម្ព័ន្ធដើម្បីប្រជាធិបតេយ្យ ជំហររបស់ពួកយើង គឺទាមទារឲ្យ គ.ជ.ប កំណត់ថា សន្លឹកឆ្លោតដែលចាត់ទុកថាបានការ គឺសន្លឹកឆ្នោតទាំងឡាយណា ដែលគូសសញ្ញាធីក ឬសញ្ញាប្រហាក់ប្រហែល ប៉ុន្តែដាច់ខាតសញ្ញាធីក ឬសញ្ញាប្រហាក់ប្រហែលនោះ ត្រូវគូសក្នុងប្រអប់រាង ៤ជ្រុងទ្រវែងតូច"។***

លោក ខឹម វាសនា បានបន្ថែមថា ជាគោលការណ៍នៃការបោះឆ្នោតជាទូទៅនៅទូទាំងពិភពលោក គឺត្រូវរក្សាភាពសម្ងាត់នៃអ្នកបោះឆ្នោត ជាដាច់ខាត។ លោកបានពន្យល់ថា ប្រសិនបើគេអនុញ្ញាតិឲ្យអ្នកបោះឆ្នោតគូសសញ្ញាអ្វីក៏បាន នោះភាពសម្ងាត់ដែលជាគោលការណ៍នៃការបោះឆ្នោត នឹងត្រូវបាត់បង់ ពោលគឺអាចកំណត់អត្តសញ្ញាណអ្នកបោះឆ្នោតបាន។ ត្រង់ចំណុចនេះ លោក ខឹម វាសនា បានលើកឧទាហរណ៍ថា គេអាចកំណត់ឲ្យអ្នកបោះឆ្នោតម្នាក់ គូសសញ្ញាដាច់ដោយឡែករៀងខ្លួន ឬគូសនៅទីតាំងផ្សេងៗគ្នា លើប្រអប់៤ជ្រុងទ្រវែងធំ ដើម្បីដឹងថា សញ្ញាទាំងនោះ ជាសញ្ញារបស់អ្នកបោះឆ្នោតរូបណា។

អ្នកចូលរួមសន្និសីទសារព័ត៌មាន នៅវិមានពិភពថ្មីសែនសុខ នាព្រឹកថ្ងៃទី១៩ ខែកក្កដានេះ

សូមបញ្ជាក់ថា ក្រៅពីធ្វើសន្និសីទសារព័ត៌មាន គណបក្សសម្ព័ន្ធដើម្បីប្រជាធិបតេយ្យ ក៏បានផ្ញើលិខិតជូនសម្ដេច ហេង សំរិន ប្រធានរដ្ឋសភា ដើម្បីស្នើរដ្ឋសភា ពិនិត្យ និងកែតម្រូវលើបញ្ហាគូសសញ្ញាគាំទ្រលើសន្លឹកឆ្នោតផងដែរ។ នៅក្នុងលិខិតដែលចុះហត្ថលេខាដោយលោក ខឹម វាសនា ចុះថ្ងៃទី១៨ ខែកក្កដានោះ LDP បានបញ្ជាក់ថា ការអនុញ្ញាតិឲ្យអ្នកបោះឆ្នោត គូសសញ្ញាគាំទ្រណាមួយក្នុងចំណោមសញ្ញាដែលបញ្ជាក់ក្នុងក្រដាសសំណួរ-ចម្លើយ ស្ដីពីការគូសសញ្ញាគាំទ្រលើគណបក្សលើសន្លឹកឆ្នោត របស់គ.ជ.ប គឺជាការទុកឱកាសឲ្យក្រុមជនខិលខូច អាចទិញលក់សន្លឹកឆ្នោត ឬគំរាមកំហែងអ្នកបោះឆ្នោត និងអាចធ្វើឲ្យប៉ះពាល់ដល់ការសម្ងាត់នៃការបោះឆ្នោត ជាដើម។

គួររំលឹកផងដែរថា កាលពីពេលថ្មីៗកន្លងទៅ គ.ជ.ប បានចេញលិខិតសំណួរ-ចម្លើយមួយ ដែលទាក់ទងនឹងការគូសសញ្ញាគាំទ្រគណបក្សលើសន្លឹកឆ្នោត ដែលក្នុងនោះ គ.ជ.ប បានដាក់សញ្ញាចំនួន ១៣ (ដូចរូបភាពខាងក្រោម)៕