ជំនន់ទឹកភ្លៀង សម្លាប់មនុស្សម្នាក់ហើយ នៅខេត្តប៉ៃលិន

2018-07-19 08:54:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី១៩ ខែកក្កដានេះ ជំនន់ទឹកភ្លៀង បានសម្លាប់មនុស្សម្នាក់នៅក្នុងខេត្តប៉ៃលិន។ នេះបើតាមការបញ្ជាក់របស់លោក ញឹម វណ្ណដា ទេសរដ្ឋមន្ត្រី ទទួលបន្ទុកអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ។

លោក ញឹម វណ្ណដា ក៏បានឱ្យដឹងដែរថា គិតមកត្រឹមថ្ងៃនេះ ជំនន់ទឹកភ្លៀង បានកើតឡើងនៅ ៧ ខេត្ត រួមមាន៖ ខេត្តកោះកុង ប៉ៃលិន បាត់ដំបង កំពត ព្រះសីហនុ កែប និងខេត្តកំពង់ស្ពឺ។

ភ្លៀងធ្លាក់នៅខេត្តប៉ៃលិន នាថ្ងៃទី១៩កក្កដា ២០១៨ (រូបថត៖ FB ក្រសួងធនធានទឹក និងឧតុនិយម)

ជំនន់ទឹកភ្លៀង ដែលបង្កឡើងដោយឥទ្ធិពលខ្យល់ព្យុះក្នុងរយៈពេលប៉ុន្មានថ្ងៃនេះ បានធ្វើឲ្យប្រជាពលរដ្ឋ ១៦៨១គ្រួសាររងគ្រោះ និងត្រូវជម្លៀសទៅកាន់ទីទួលសុវត្ថិភាព ហើយក៏ប៉ះពាល់ដំណាំស្រូវ និងដំណាំចម្ការរាប់ពាន់ហិកតាផងដែរ។

ចំណែកនៅផ្លូវជាតិលេខ៤ ទឹកបានស្រកអស់ ហើយកាលពីព្រឹកមិញនេះ ចរាចរណ៍ក៏ត្រូវបានបើកឲ្យឆ្លងកាត់ឡើងវិញដែរ។

រហូតមកដល់រសៀលថ្ងៃដដែលនេះ ជំនន់ទឹកភ្លៀង បានហក់ឡើងខ្លាំង នៅខេត្តកំពង់ស្ពឺ និងនៅខេត្តកំពត។ រីឯខេត្តដទៃទៀត បានស្រកចុះ ជាបណ្តើរៗហើយ៕

អត្ថបទ៖ លីហៀង