ផ្លូវជាតិ៤ខ្សែ នឹងត្រូវជួសជុលភ្លាមៗ ក្រោយអាកាសធាតុល្អប្រសើរឡើងវិញ
- 2018-07-20 00:28:08
- ចំនួនមតិ 0 | ចំនួនចែករំលែក 0
ផ្លូវជាតិ៤ខ្សែ នឹងត្រូវជួសជុលភ្លាមៗ ក្រោយអាកាសធាតុល្អប្រសើរឡើងវិញ
ចន្លោះមិនឃើញ
មន្ទីរសាធារណការ និងដឹកជញ្ជូនខេត្តកំពត បានប្រកាសឲ្យដឹងថា មន្ទីរនឹងធ្វើការជួសជុលផ្លូវជាតិចំនួន៤ខ្សែភ្លាមៗ បន្ទាប់ពីអាកាសធាតុល្អប្រសើរឡើងវិញ ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ។ ផ្លូវជាតិទាំងនោះ មានដូចជា ផ្លូវជាតិលេខ៣ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១។
មូលហេតុនៃការជួសជុល បណ្ដាលមកពីផ្លូវជាតិទាំង៤ខ្សែបានទទួលរងការខូចខាត ព្រោះមានរថយន្តធំៗជាច្រើនបានធ្វើចរាចរណ៍ឆ្លងកាត់ដូចជា រថយន្តដឹកប្រេងឥន្ធនៈ រថយន្តដឹកធ្យូងថ្ម រថយន្តកុងតឺន័រធំៗ និងរថយន្តផ្សេងៗជាច្រើន ដែលបានបង្វែរទិសចរាចរណ៍ពីផ្លូវជាតិលេខ៤ មកបត់កាត់តាមខេត្តកំពត។
សូមបញ្ជាក់ថា ផ្លូវជាតិលេខ៤ត្រូវបានផ្អាកចរាចរណ៍ជាបណ្ដោះអាសន្នតាំងពីថ្ងៃទី១៧ រហូតមកទល់នឹងព្រឹកថ្ងៃទី១៩ ខែកក្កដា ឆ្នាំ២០១៨ ដោយសារតែទឹកជំនន់នៅត្រង់ចំណុចស្ពានសំរោង (គម ១១៦) ភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។ បច្ចុប្បន្ន នៅលើផ្លូវជាតិលេខ៤ អាជ្ញាធរបានអនុញ្ញាតឲ្យរថយន្តតូចៗធ្វើចរាចរណ៍ឡើងវិញហើយ៕