ជនរងគ្រោះដោយសារមីន មានការធ្លាក់ចុះពីជាង៨០០នាក់មកនៅជាង១០០នាក់ក្នុងមួយឆ្នាំៗ
- 2018-07-21 03:33:08
- ចំនួនមតិ 0 | ចំនួនចែករំលែក 0
ជនរងគ្រោះដោយសារមីន មានការធ្លាក់ចុះពីជាង៨០០នាក់មកនៅជាង១០០នាក់ក្នុងមួយឆ្នាំៗ
ចន្លោះមិនឃើញ
របាយការណ៍មជ្ឈមណ្ឌលសកម្មភាពកម្ចាត់មីនកម្ពុជា បានបង្ហាញឲ្យដឹងថា ជនរងគ្រោះដោយសារគ្រាប់មីនក្នុងឆ្នាំ២០០០-២០០៥ មានអត្រាជាង ៨០០នាក់ ក្នុងមួយឆ្នាំៗ ហើយមកដល់ឆ្នាំ២០១៦-២០១៨ ធ្លាក់មកនៅជាង ១០០នាក់ប៉ុណ្ណោះក្នុងមួយឆ្នាំៗ។ ទោះបីជាមានការធ្លាក់ចុះអត្រាគ្រោះថ្នាក់យ៉ាងខ្លាំងក៏ដោយ ក៏តួលេខនេះនៅតែមានចំនួនខ្ពស់ជាងបណ្តាប្រទេសដែលមានបញ្ហាគ្រាប់មីនទាំងឡាយលើសាកលលោក។
របាយការណ៍បានបញ្ជាក់ថា គិតចាប់ពីឆ្នាំ១៩៩២ រហូតមកដល់ខែមីនា ឆ្នាំ២០១៨ កន្លងមកនេះ ស៊ីម៉ាក់ បានសម្រេចលទ្ធផលដូចជា៖ រុករក និងកម្ទេចចោលគ្រាប់មីនប្រឆាំងមនុស្សជាង ៥១ម៉ឺនគ្រាប់ មីនប្រឆាំងរថក្រោះជាង ១ម៉ឺនគ្រាប់ គ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានចំនួនជាង ២លានគ្រាប់។ សរុបរួមទាំងអស់ ទាំងគ្រាប់មីន និងយុទ្ធភណ្ឌមិនទាន់ផ្ទុះ គឺជាង ២,៥លានគ្រាប់ ដែលត្រូវបានបោសសម្អាត។ ក្នុងនោះបានធ្វើការបោសសម្អាតផ្ទៃដីមានមីនបាន ចំនួនជាង ៩៤៣គីឡូម៉ែត្រក្រឡាផងដែរ។
របាយការណ៍បានបន្តថា ជនរងគ្រោះខ្លះត្រូវទទួលគ្រោះថ្នាក់លើដីស្រែចម្ការរបស់ខ្លួនឯងតែម្តង ដែលពួកគាត់បានធ្វើការដាំដុះជាច្រើនឆ្នាំមកហើយ។ ហើយដោយអ្នកខ្លះក៏បានដឹងថា ដីស្រែចម្ការទាំងនោះ គឺស្ថិតក្នុងតំបន់ប្រយុទ្ធគ្នាពីមុនមក ប៉ុន្តែពួកគាត់នៅតែសម្រេចចិត្តប្រើប្រាស់ដីនោះ ដើម្បីគាំទ្រជីវភាពរស់នៅរបស់ពួកគាត់ បើទោះបីដីនោះមិនទាន់បានបោសសម្អាតមីនក៏ដោយ៕