ហ្វីលីពីនព្រួយបារម្ភកាន់តែខ្លាំងឡើង ក្រោយទទួលសញ្ញាព្រមានពីចិនកាន់តែច្រើនឡើង

2018-08-01 04:17:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសហ្វីលីពីនបានបង្ហាញការព្រួយបារម្ភកាន់តែខ្លាំងឡើងចំពោះមហាយក្សចិន ជុំវិញការកើនឡើងសញ្ញាព្រមានយន្តហោះ និងនាវាហ្វីលីពីន ឲ្យស្ថិតនៅឆ្ងាយពីកោះ និងទឹកដីក្នុងសមុទ្រចិនខាងត្បូង ដែលកំពុងទាមទារដោយប្រទេសទាំងពីរ។ នេះបើតាមការបញ្ជាក់របស់មន្រ្តីហ្វីលីពីន។

នាវាល្បាតកងទ័ពចិននៅសមុទ្រចិនខាងត្បូង (រូបភាព៖ South China Morning Post)

របាយការណ៍រដ្ឋាភិបាលហ្វីលីពីនបានបង្ហាញថា នៅឆមាសទី២ ឆ្នាំ២០១៧ កន្លងទៅ យន្តហោះយោធាហ្វីលីពីនបានទទួលសញ្ញាព្រមានចំនួន ៤៦ដង នៅពេលកំពុងធ្វើលំហាត់ហោះហើរនៅជិតកោះសិប្បនិមិត្ត ដែលសាងសង់ដោយចិនក្នុងប្រជុំកោះ Spratly នាដែនសមុទ្រចិនខាងត្បូង។

សញ្ញាព្រមាននេះ គឺត្រូវបញ្ជូនចេញមកពីនាវាឆ្មាំសមុទ្រចិន កាលពីឆ្នាំមុន ប៉ុន្ដែបច្ចុប្បន្ននេះ ហ្វីលីពីនសង្ស័យថា សញ្ញាព្រមានត្រូវបានបញ្ជូនចេញពីកោះសិប្បនិមិត្តដែលឧបករណ៍ទំនាក់ទំនង និងឈ្លបការណ៍ ត្រូវបានដំឡើងរួចរាល់ រួមជាមួយសព្វាវុធដែលមានដូចជាមីស៊ីលជាដើម។

ជាមួយគ្នានេះ យន្ដហោះកងទ័ពអាកាសហ្វីលីពីន ដែលធ្វើលំហាត់ហោះហើរនៅជិតកោះសាងសង់ដោយចិន បានទទួលសញ្ញាព្រមានចុងក្រោយ ចំនួន ២ដងជាប់ៗគ្នា កាលពីខែមករា ២០១៨។ ដំបូងកងទ័ពចិនព្រមានថា "ចាកចេញជាបន្ទាន់ និងរក្សាការជៀសវាងការយល់ច្រឡំ"។ បន្ដិចក្រោយមក យន្តហោះហ្វីលីពីនបានទទួលការគំរាមតែម្ដង "យន្តហោះហ្វីលពីន ខ្ញុំព្រមានអ្នកម្ដងទៀត ចាកចេញជាបន្ទាន់ ឬអ្នកនឹងទទួលអាចទទួលផលវិបាកនានា"។ នេះបើតាមរបាយការណ៍របស់រដ្ឋាភិបាលហ្វីលីពីន៕

ប្រភព៖ Philstar ប្រែសម្រួល៖ វាសនា