កូនខ្មែរជាង១០០នាក់ នឹងបង្ហាញរបាំប្រពៃណីច្រើនទម្រង់នៅថ្ងៃស្អែកនេះ
- 2018-08-08 09:33:57
- ចំនួនមតិ 0 | ចំនួនចែករំលែក 0
កូនខ្មែរជាង១០០នាក់ នឹងបង្ហាញរបាំប្រពៃណីច្រើនទម្រង់នៅថ្ងៃស្អែកនេះ
ចន្លោះមិនឃើញ
នៅព្រឹកថ្ងៃទី៨ ខែសីហា ឆ្នាំ២០១៨ សាលាមធ្យមសិក្សាវិចិត្រសិល្បៈបានរៀបចំហាត់សមរបាំច្រើនទម្រង់ទៅលើសិស្សប្រុសស្រីជាង១០០នាក់ មុនថ្ងៃប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នៅភូមិបឹងសំយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ការប្រឡងនេះសិស្សទាំងអស់នឹងយករបាំប្រពៃណីខ្មែរមួយចំនួនទៅបង្ហាញមានដូចជា របាំបុរាណ "ឈួយឆាយបួងសួង" របាំប្រពៃណី "ល្បុក្កតោ" ល្ខោនយីកេ "មាយើង" សៀក " មហិទ្ធិឫទ្ធិនាគរាជ" ល្ខោននិយាយ "កំពង់ធំជំរុំចិត្ត" និងល្ខោនបាសាក់ "មរណមាតា" ជាដើម។
“កន្លងមកគឺយើងតែងតែធ្វើរៀងរាល់ឆ្នាំ ព្រោះសិស្សមានប្រឡងចេញ និងចូល។ ចំពោះការប្រឡងចេញនេះមានពីរទី១គឺខាងសញ្ញាប័ត្រឌីប្លូម និងទី២គឺសញ្ញាប័ត្របាក់ឌុប ហើយពួកគាត់បញ្ចេញស្នាដៃទៅតាមចំណេះជំនាញដែលបានរៀនកន្លងមក"។នេះបើតាមអ្នកស្រី នាយិកាខាងលើបន្ថែម។
ថ្លែងក្នុងពិធីខាងលើលោក វិន ឡៃជូ អគ្គនាយករងបច្ចេកទេសវប្បធម៌ និងជានាយកស្ដីទីសាលាមធ្យមសិក្សាវិចិត្រសិល្បៈបានមានប្រសាសន៍ថា ក្រោយពីសិស្សបញ្ចប់ការសិក្សាសញ្ញាប័ត្របាក់ឌុប ពួកគេទាំងអស់មានចំណេះជំនាញឯកទេសរៀងខ្លួនអាចយកទៅប្រកបរបរចិញ្ចឹមជីវិតបាន។ កន្លងមកមានសិស្សមួយចំនួនមានឱកាសបានចេញទៅធ្វើការនៅក្រៅប្រទេសទៀតផង។
ឆ្លៀតក្នុងឱកាសនេះលោកនាយកស្ដីទី ក៏សូមអំពាវនាវដល់ទ្រង់ឯកឧត្ដម លោកជំទាវអ្នកនាងកញ្ញា និងពុកម៉ែបងប្អូនទៅចូលរួមទស្សនាឲ្យបានច្រើនកុះករ ចំពោះការប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នៅថ្ងៃស្អែកនេះ។ ដើម្បីលើកស្ទួយសិល្បៈវប្បធម៌ដ៏ស្រស់ផូរផង់ប្រពៃណីខ្មែរនៅលើឆាកអន្តរជាតិ។
ជាចុងក្រោយលោក សុំអំពាវនាវដល់ប្អូនៗមួយចំនួនប្រសិនបើចង់សិក្សានៅ សាលាមធ្យមសិក្សាវិចិត្រសិល្បៈអាចមកចុះឈ្មោះបាន ព្រោះសាលានឹងបើកទទួលសិស្សថ្មីនៅខែក្រោយនេះហើយ។
ការប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នឹងមានការអញ្ជើញចូលរួមពី លោក សោម សុគន្ធ រដ្ឋលេខាធិការ តំណាងឲ្យលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ៕