អាមេរិក ផ្តល់ជំនួយយោធាដល់ស្រីលង្កា ដើម្បីកាត់បន្ថយឥទ្ធិពលចិនលើប្រទេសនេះ

2018-08-14 03:38:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក បានប្រកាសកាលពីថ្ងៃចន្ទម្សិលមិញថា ខ្លួននឹងផ្ដល់ជំនួយដល់យោធាស្រីលង្កាចំនួន ៣៩លានដុល្លារ ដើម្បីពង្រឹងសន្តិសុខដែនសមុទ្រ ខណៈចិន កំពុងបន្តអភិវឌ្ឍន៍យុទ្ធសាស្ត្ររបស់ខ្លួន នៅក្នុងប្រទេសនេះ។

ទីភ្នាក់ងារសារព័ត៌មាន AFP បានដកស្រង់សម្ដីរបស់ស្ថានទូតអាមេរិកប្រចាំស្រីលង្កាដូច្នេះថា ជំនួយចំនួន ៣៩លានដុល្លារនេះ កំពុងរង់ចាំការអនុញ្ញាតពីសភាជាន់ខ្ពស់អាមេរិកសិន មុននឹងអាចផ្ដល់ទៅឲ្យរដ្ឋាភិបាលស្រីលង្កាបាន។

យោធាស្រីលង្កា ធ្វើព្យុហយាត្រា នាពេលកន្លងមក (រូបថត៖ វេបសាយ army.lk)

ស្ថានទូតដដែល បានបន្តថា «យើង នឹងចរចាជាមួយរដ្ឋាភិបាលស្រីលង្កាអំពីការចាត់ចែងជំនួយនេះ ដើម្បីប្រើប្រាស់លើកិច្ចការសំខាន់ៗមួយចំនួនរួមមានដូចជា គំនិតផ្ដួចផ្ដើមឆកសមុទ្រ Bengal ជំនួយសប្បុរសធម៌ និងការទប់ស្កាត់គ្រោះអន្តរាយជាដើម»។

ជំនួយសម្រាប់ប្រទេសនៅក្នុងមហាសមុទ្រឥណ្ឌានេះ គឺធ្វើឡើង ស្របពេលដែលចិន ដែលជាមហាអំណាចសេដ្ឋកិច្ចលំដាប់ទី២ បន្តបង្កើនការវិនិយោគរបស់ខ្លួន ទៅលើវិស័យកំពង់ផែ និងគម្រោងសាងសង់ផ្សេងៗទៀត នៅក្នុងប្រទេសស្រីលង្កា ដែលជាច្រកដ៏សំខាន់ នៅក្នុងគំនិតផ្ដួចផ្ដើមហេដ្ឋារចនាសម្ព័ន្ធ «ផ្លូវ និងខ្សែក្រវាត់» ។

សូមរម្លឹកបន្តិចដែរថា ស្រីលង្កា កាលពីឆ្នាំ២០១៧ បានប្រគល់កំពង់ផែយុទ្ធសាស្ត្រមួយ ទៅឲ្យទីក្រុងប៉េកាំងកាន់កាប់ចំនួន ៩៩ឆ្នាំ ដោយសាររដ្ឋាភិបាលប្រទេសនេះ គ្មានសមត្ថភាពក្នុងការសងបំណុល ដែលជំពាក់ចិន សម្រាប់គម្រោងកំពង់ផែតម្លៃជាង ១,៤ពាន់លានដុល្លារនេះ។

យ៉ាងណាមិញ រដ្ឋាភិបាលចិន នៅតែប្ដេជ្ញាបន្តផ្ដល់កម្ចីហិរញ្ញវត្ថុ ទៅឲ្យប្រទេសស្រីលង្កា បើទោះបីជារងការព្រមាន ពាក់ព័ន្ធនឹងការកើនឡើងនៃបំណុលដ៏ច្រើនលើសលប់ របស់ប្រទេស[ស្រីលង្កា]នេះក្ដី។

គួរបញ្ជាក់ដែរថា ជំនួយរបស់អាមេរិកសម្រាប់ប្រទេសស្រីលង្កា គឺជាផ្នែកមួយនៃកញ្ចប់ថវិកាប្រមាណ ៣០០លានដុល្លារ ដែលទីក្រុងវ៉ាស៊ីនតោន បានផ្ដល់សម្រាប់តំបន់អាស៊ីអាគ្នេយ៍ និងអាស៊ីខាងត្បូង ដើម្បីធានាឲ្យបាននូវ «សេរីភាព បើកទូលាយ និងរបៀបរៀបរយតាមមូលដ្ឋានច្បាប់ នៅក្នុងតំបន់ឥណ្ឌូ-ប៉ាស៊ីហ្វិក»៕

ប្រភព៖ South China Morning Post ប្រែសម្រួល៖ អឹុម ម៉េងស៊ាង