តួកគី ប្រកាសឈប់ប្រើប្រាស់ iPhone

2018-08-14 10:26:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធិបតីតួកគី Recep Tayyip Erdogan នៅថ្ងៃទី១៤ ខែសីហា ឆ្នាំ២០១៨នេះ បានថ្លែងថា ប្រទេសតួកគី នឹងឈប់ប្រើប្រាស់ផលិតផលអេឡិចត្រូនិចរបស់អាមេរិក រួមទាំង iPhone បន្ទាប់ពីក្រុងវ៉ាស៊ីនតោន បានដាក់ទណ្ឌកម្មមកលើក្រុងអានការ៉ា ដោយធ្វើការដំឡើងពន្ធទ្វេដងលើផលិតផលអាលុយមីញ៉ូម និងដែកថែប របស់តួកគី។

លោកប្រធានាធិបតីតួកគី Recep Tayyip Erdogan ថ្លែងនៅថ្ងៃទី១៣ ខែសីហា ឆ្នាំ២០១៨ (រូបថត៖ AP)

លោក Erdogan បានឲ្យដឹងថា បើឈប់ប្រើប្រាស់ iPhone របស់អាមេរិក តួកគីនឹងងាកទៅប្រើប្រាស់ទូរសព្ទ Samsung របស់កូរ៉េខាងត្បូង ឬម៉ាក Venus និង Vestel ដែលជាផលិតផលរបស់តួកគីវិញ។

សូមបញ្ជាក់ថា លោក Erdogan ជាអ្នកគាំទ្រផលិតផលរបស់ Apple នាពេលកន្លងមក ដោយត្រូវបានអ្នកប្រមាញ់រូបថត ផ្ដិតយករូបថតរបស់លោក ពេលកំពុងប្រើប្រាស់ឧបករណ៍របស់អាមេរិកដូចជា iPhone និង iPad ជាដើម។

លោក Erdogan កំពុងនិយាយទូរសព្ទ ដោយប្រើប្រាស់ iPhone (រូបថត៖ Anadolu Agency)

មុនការលើកឡើងរបស់ប្រធានាធិបតីតួកគីនេះដែរ លោក ដូណាល់ ត្រាំ ប្រធានាធិបតីអាមេរិក បានបង្ហោះនៅលើបណ្ដាញសង្គម Twitter របស់លោកថា អាមេរិកកំពុងដំឡើងពន្ធលើផលិតផលអាលុយមីញ៉ូម និងដែកថែបតួកគី។ ការលើកឡើងដូច្នេះ គឺបន្ទាប់ពីតួកគី បានចាប់ខ្លួនអាចារ្យសាសនាគ្រិស្គ ជនជាតិអាមេរិកម្នាក់ ឈ្មោះ Andrew Brunson ដែលតួកគីចោទថា បានគាំទ្រដល់ការធ្វើរដ្ឋប្រហារយោធាដែលទទួលបរាជ័យ ទម្លាក់លោក Erdogan កាលពី២ឆ្នាំមុន៕

ប្រភព៖ Channelnewsasia ប្រែសម្រួល៖ លាភ.