គណបក្សចំនួន៣ បង្ហាញជំហរជុំវិញវេទិកាពិគ្រោះយោបល់ជាមួយនាយករដ្ឋមន្រ្តី

2018-08-16 02:26:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានប្រកាសពីគម្រោងបង្កើតវេទិកាពិគ្រោះយោបល់ជាមួយបណ្តាគណបក្សដែលចូលរួមបោះឆ្នោតដែលមិនទទួលបានអាសនៈ នៅមុនការបង្កើតរាជរដ្ឋាភិបាលថ្មីនាពេលខាងមុខនេះ។ ជុំវិញវេទិកានេះ គណបក្សមួយចំនួនបានបានបង្ហាញពីជំហរ និងមតិរៀងៗខ្លួនដូចខាងក្រោម៖

លោក ពេជ្រ ស្រស់ ប្រធានគណបក្សយុវជនកម្ពុជា បានប្រកាសស្វាគមន៍ ហើយចាត់ទុកថាជាការចាប់អារម្មណ៍ និងជារបត់នយោបាយថ្មីនៅកម្ពុជា ឆ្ពោះទៅរកការផ្សះផ្សារ និងអភិវឌ្ឍន៍ជាតិ ដើម្បីឲ្យអ្នកនយោបាយ ដែលមិនជាប់ឆ្នោត មានឱកាសចូលរួមការងារអភិវឌ្ឍន៍ប្រទេសជាតិ។

ដោយប្រកាសត្រៀមខ្លួនចូលរួមវេទិការវាងនាយករដ្ឋមន្ត្រី និងគណបក្សក្រៅរដ្ឋសភា នាពេលឆាប់ៗនេះ លោក ពេជ្រ ស្រស់ បានលើកឡើងថា នៅពេលជួបជជែកជាមួយសម្តេចនាយករដ្ឋមន្ត្រី ហ៊ុន សែន លោកត្រៀមប្រធានបទ ២ សំខាន់ គឺទី១-បញ្ហាកសិកម្ម និងទី២-ពាក់ព័ន្ធនឹងច្បាប់ចូលសញ្ជាតិខ្មែរ។ លោកពេជ្រស្រស់ ក៏ចង់ឲ្យវេទិកានេះ ធ្វើឡើងរៀងរាល់ ប្រាំមួយខែម្តង ដើម្បីផ្តល់ឱកាសដល់គណបក្សក្រៅរដ្ឋសភា អាចផ្តល់មតិយោបល់ ជួយដល់ការងារអភិវឌ្ឍន៍ប្រទេសជាតិ។

លោក ពេជ្រ ស្រស់ ប្រធានគណបក្សយុវជនកម្ពុជា

ចំណែកគណបក្សធម្មាធិបតេយ្យ របស់លោកស្រី ពោធិតី សាវត្ថី តាមរយៈអ្នកនាំពាក្យ លោក ឆូន ឆវ័ន្ត ក៏បានប្រកាសស្វាគមន៍ និងត្រៀមខ្លួន ដើម្បីចូលរួមវេទិកាពិគ្រោះយោបល់ នាពេលខាងមុខ។

លោក ឆូន ឆវ័ន្ត លើកឡើងថា “វេទិកានេះ ជាការបង្រួបបង្រួមជាតិផង និងដើម្បីជួយដល់ប្រជារាស្ត្រម្ចាស់ឆ្នោតផង ហើយក៏ស្របតាមការចង់បានរបស់គណបក្សធម្មាធិបតេយ្យ ដែលលោកស្រី ពោធិតី សាវត្ថី បានសរសេរលិខិត ដាក់ជូនគណបក្សប្រជាជនកម្ពុជា កាលពីថ្ងៃទី៦ ខែសីហា ឆ្នាំ២០១៨ ដើម្បីឲ្យគណបក្សនយោបាយ ដែលមិនជាប់ឆ្នោត អាចធ្វើជាអ្នកសង្កេតការណ៍ ក្នុងកិច្ចប្រជុំរដ្ឋសភា និងអាចផ្តល់មតិយោបល់ សម្រាប់ចូលរួមក្នុងការពិភាក្សាអនុម័តច្បាប់នានា ផងដែរ”។

លោកស្រី ពោធិតី សាវត្ថី ប្រធានគណបក្សធម្មាធិបតេយ្យ

ដោយឡែក លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន បានចាត់ទុកវេទិកាពិគ្រោះយោបល់រវាងនាយករដ្ឋមន្ត្រី និងគណបក្សក្រៅរដ្ឋសភានេះ ថានៅក្នុងសង្គមប្រជាធិបតេយ្យ គេតែងតែមានវេទិកានេះ។ នេះជាឥរិយាបថ ដើម្បីបន្ថយអរិយភាព ជម្លោះរវាងគណបក្សនយោបាយ។ ក៏ប៉ុន្តែលោកថា គណបក្សប្រជាធិបតេយ្យមូលដ្ឋាន មិនទាន់ប្រាកដថា នឹងចូលរួម ឬក៏មិនចូលរួមវេទិកានេះទេ ដោយនៅចាំមើលស្វែងយល់ និងពិចារណាលើគម្រោងរៀបចំវេទិកានោះសិន។

លោក យ៉េង វិរៈ ប្រធានគណបក្សប្រជាធិបតេយ្យមូលដ្ឋាន

រីឯគណបក្សផ្សេងៗទៀតដូចជា គណបក្សឆន្ទៈខ្មែរ គណបក្សខ្មែរក្រោក គណបក្សខ្មែរមួយ និងគណបក្សសញ្ជាតិកម្ពុជា ក៏បានប្រកាសរៀងៗខ្លួនផងដែរ ពីការបង្ហាញជំហរគាំទ្រចំពោះសម្តេច ហ៊ុន សែន ដែលចង់បង្កើតវេទិកាពិគ្រោះយោបល់ រវាងគណបក្សនយោបាយទាំងអស់ ដើម្បីដោះស្រាយបញ្ហាសំខាន់ៗរបស់ប្រទេសជាតិ៕

ប្រភព៖ រស្មីកម្ពុជា ប្រែសម្រួល៖ សំភី