Facebook ចូលប្រឡូកក្នុងការផ្សាយលីគបាល់ទាត់អេស្ប៉ាញ នៅអាស៊ី

2018-08-16 07:23:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្មីៗនេះ ក្រុមហ៊ុន Facebook បានចុះកុងត្រាជាមួយអ្នករៀបចំលីគបាល់ទាត់ La Liga របស់ប្រទេសអេស្ប៉ាញ ដោយទិញសិទ្ធិផ្សាយបន្តផ្ទាល់ ចំនួន ៣រដូវកាល ចាប់ពីរដូវកាលក្រោយតទៅ នៅប្រទេសមួយចំនួន ក្នុងទ្វីបអាស៊ី។

Barcelona [រូបថត៖ AP]

ប្រទេសដែលទាំងនោះ មានដូចជា ឥណ្ឌា អាហ្វហ្គានីស្ថាន បង់ក្លាដេស ប៊ូតង់ នេប៉ាល់ ម៉ាល់ឌីវ ស្រីលង្កា និង ប៉ាគីស្ថាន។

កិច្ចព្រមព្រៀងដែលមិនត្រូវបានបញ្ចេញចំនួនទឹកប្រាក់នេះ ផ្ដល់សិទ្ធិផ្សាយបន្តផ្ទាល់ជូនអ្នកប្រើប្រាស់បណ្ដាញសង្គម Facebook ចំនួនជាង ៣៤៨លាននាក់ ឲ្យទស្សនាបានដោយឥតគិតថ្លៃ។ លីគកំពូលអេស្ប៉ាញ មានការប្រកួតសរុបចំនួន ៣៨០ប្រកួតក្នុងមួយរដូវកាល។

លោក Peter Hutton នាយកផ្នែកផ្សាយផ្ទាល់កីឡាសាកលលោករបស់ Facebook ប្រចាំប្រទេសឥណ្ឌា បានប្រាប់ឲ្យដឹងថា ការផ្សាយបន្តផ្ទាល់នៅក្នុងប្រទេសអាស៊ីខាងលើ គឺជាការសាកល្បងតែប៉ុណ្ណោះ។

ចំណែកលោក Jose Antonio Cachaza អ្នកគ្រប់គ្រងទីស្នាក់ការលីគ La Liga ប្រចាំប្រទេសឥណ្ឌាដែលត្រូវបានបើកឲ្យដំណើរការកាលពីឆ្នាំ២០១៦ បានឲ្យដឹងថា La Liga ចង់ឲ្យកិច្ចព្រមព្រៀងនេះទទួលបានជោគជ័យ ដើម្បីបោះជំហានបន្តទៅមុខទៀត សម្រាប់ការផ្សាយនៅបណ្ដាប្រទេសនានាលើពិភពលោក៕

ប្រភព៖ theguardian ប្រែសម្រួល៖ លាភ.