សម្ដេច ហ៊ុន សែន ប្រកាសប្រារព្ធបុណ្យធំ និងពិធីឆ្លងឆ្នាំ២០១៨ នៅទីតាំងមួយ

2018-08-23 03:37:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចនាយករដ្ឋមន្រ្តី ហ៊ុន សែន នៅថ្ងៃទី២៣ ខែសីហា ២០១៨ នេះ បានប្រកាសប្រារព្ធពិធីបុណ្យរម្លឹកខួប ២០ឆ្នាំ នៃការបញ្ចប់សង្រ្គាម និងទទួលបានសន្ដិភាពពេញលេញ នៅវិមានឈ្នះឈ្នះ នាថ្ងៃទី២៩ ខែធ្នូ ឆ្នាំ២០១៩។ ជាមួយគ្នានេះ សម្ដេចក៏ប្រកាសឲ្យរៀបចំពិធីឆ្លងឆ្នាំ២០១៨ នៅទីតាំងនេះផងដែរ ដោយមានការប្រគុំតន្រ្តី និងបាញ់កាំជ្រួច ៣ថ្ងៃយប់ជាប់ៗគ្នា ចាប់ពីថ្ងៃទី២៩ ដល់ ៣១ ខែធ្នូ ឆ្នាំ២០១៨។

វិមានឈ្នះ ឈ្នះ ដែលកំពុងសាងសង់ កាលពីដើមខែកក្កដា ២០១៨/ រូបភាព៖ ហ្វេសប៊ុកវិមានឈ្នះ ឈ្នះ

ការប្រកាសរបស់សម្ដេចនាយករដ្ឋមន្រ្តី បានធ្វើឡើងក្នុងពិធីចុះជួបសំណេះសំណាលជាមួយកម្មករ ១៧៥០៣នាក់ មកពីរោងចក្រ សហគ្រាសចំនួន១២ នៅក្នុងភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្តាល នៅថ្ងៃទី២៣ ខែសីហា ២០១៨នេះ។

ជាមួួយគ្នានេះ សម្ដេច ហ៊ុន សែន ក៏បានណែនាំឲ្យមានការរៀបចំស្ដង់ពីខេត្ត រោងចក្រ និងក្រុមហ៊ុននានា អំឡុងការរៀបចំពិធីបុណ្យរម្លឹកខួប ២០ឆ្នាំនៃការបញ្ចប់សង្រ្គាម និងទទួលបានសន្ដិភាពពេញលេញ និងពិធីឆ្លងឆ្នាំ២០១៨ នាពេលខាងមុខនេះផងដែរ។

សូមបញ្ជាក់ថា វិមានឈ្នះឈ្នះ មានកម្ពស់ប្រមាណ ៥៤ម៉ែត្រ ទទឹង ៣៦ម៉ែត្រ ត្រូវបានសាងសង់លើផ្ទៃដីសរុបចំនួន ៨ហិចតា ក្នុងតំបន់អភិវឌ្ឍន៍របស់អ្នកឧកញ៉ា លី យ៉ុងផាត់ ស្ថិតនៅក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។ វិមានដែលយកគំរូតាមរចនាបទប្រាង្គប្រាសាទនានានេះ ត្រូវបានសាងសង់ឡើង ដើម្បីទុកជាមរតក សម្រាប់កូនខ្មែរជំនាន់ក្រោយ ស្វែងយល់ពីការបញ្ចប់សង្គ្រាមនៅកម្ពុជា តាមរយៈនយោបាយឈ្នះឈ្នះរបស់សម្តេច ហ៊ុនសែន៕