កម្ពុជា-ថៃ នឹងបើកដំណើរការរថភ្លើងឆ្លងកាត់ប្រទេសទាំង២ នៅដើមឆ្នាំ២០១៩
- 2018-08-29 01:29:09
- ចំនួនមតិ 0 | ចំនួនចែករំលែក 0
កម្ពុជា-ថៃ នឹងបើកដំណើរការរថភ្លើងឆ្លងកាត់ប្រទេសទាំង២ នៅដើមឆ្នាំ២០១៩
ចន្លោះមិនឃើញ
រាជរដ្ឋាភិបាលកម្ពុជា និងថៃ បានឯកភាពគ្នាក្នុងការឈានទៅចុះហត្ថលេខារួមគ្នាលើកិច្ចព្រមព្រៀងដឹកជញ្ជូនឆ្លងដែនតាមរថភ្លើងនៅចុងឆ្នាំ២០១៨ ខាងមុខនេះ ដើម្បីអាចបើកដំណើរការនូវការធ្វើចរាចរណ៍ឆ្លងកាត់ប្រទេសទាំងពីរនៅដើមឆ្នាំ២០១៩ខាងមុខ។ នេះបើតាមការចុះផ្សាយរបស់ AKP កាលពីថ្ងៃទី២៨ ខែសីហា ឆ្នាំ២០១៨។
លោក លី បូរិន អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ឱ្យដឹងថា តាមរយៈកិច្ចប្រជុំផ្លូវដែកសិង្ហបុរី-គុនមិញ នៅប្រទេសម៉ាឡេស៊ីកាលពីពេលថ្មីៗនេះថា រាជរដ្ឋាភិបាលកម្ពុជា-ថៃ បានបញ្ជាក់ដូចគ្នាថា ភាគីទាំងពីរបានបញ្ជូនកិច្ចព្រមព្រៀងស្តីពីការដឹកជញ្ជូន ឆ្លងដែនតាមផ្លូវដែកទៅកាន់ក្រសួងការបរទេសរៀងៗខ្លួនរួចរាល់ហើយ។ ប៉ុន្តែខាងភាគីថៃថា នៅរង់ចាំសភាអនុម័តបន្ថែមទៀត ទើបអាចឈានទៅចុះហត្ថលេខារួមគ្នាដោយនាយករដ្ឋមន្រ្តីនៃប្រទេសទំាងពីរនៅចុងឆ្នាំ២០១៨នេះ។
លោកបានបន្ដថា នៅក្នុងអំឡុងពេលចុះហត្ថលេខានេះដែរ ភាគីថៃ ក៏នឹងផ្តល់ជំនួយក្បាលរថភ្លើងចំនួន ១គ្រឿងរួមទំាងទូរថភ្លើងចំនួន ៤ទូ ដើម្បីបង្ហាញពីការរឹតចំណងមិត្តភាពរវាងប្រទេសទំាងពីរ ព្រមទាំងបើកដំណើរការសេវាដឹកជញ្ជូនទំនិញ និងមនុស្សឆ្លងដែន រវាងប្រទេសទំាងពីរឱ្យកាន់តែមានភាពរលូនដើម្បីបម្រើដល់វិស័យសេដ្ឋកិច្ចជាតិ។
គម្រោងភ្ជាប់សេវាដឹកជញ្ជូនទំនិញ និងមនុស្សតាមផ្លូវដែករវាងកម្ពុជា-ថៃនេះ ពិតជាមានសារៈសំខាន់ណាស់ ដើម្បីកាត់បន្ថយការខូចខាតផ្លូវជាតិ និងគ្រោះហានិភ័យផ្សេងៗទៀត ស្របពេលដែលផ្លូវដែកដឹកជញ្ជូនទំនិញបានច្រើន សេវាមានតម្លៃថោក និងចំណេញថវិកាថែមទៀត។ នេះបើតាមការលើកឡើងរបស់មន្រ្តីអ្នកនាំពាក្យក្រសួងសាធារណការ។
សូមបញ្ជាក់ថា ការឈានទៅភ្ជាប់សេវាដឹកជញ្ជូនផ្លូវដែករវាងកម្ពុជា-ថៃ និងបណ្តាប្រទេសមួយចំនួនទៀតក្នុងតំបន់នេះ បន្ទាប់ពីកម្ពុជាបានកែលម្អផ្លូវដែករបស់ខ្លួន ស្របតាមស្តង់ដារ ដើម្បីបម្រើសេវាដឹកជញ្ជូនឆ្លងដែនអន្តរជាតិ៕
អត្ថបទទាក់ទង៖
កម្ពុជា-ថៃ ឯកភាពលើចំណុចសេសសល់ នៃកិច្ចព្រមព្រៀងតភ្ជាប់ផ្លូវដែក
ថៃ ផ្តល់ដែក ៦០គីឡូម៉ែត្រឱ្យកម្ពុជា សម្រាប់ជួសជុលផ្លូវរថភ្លើង