គ្រូបង្វឹកសញ្ជាតិកូរ៉េខាងត្បូង និយាយអ្វីខ្លះ មុនដឹកនាំវៀតណាម ប៉ះជាតិខ្លួនឯងល្ងាចនេះ?

2018-08-29 02:49:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមបាល់ទាត់ U-23 វៀតណាម ដែលដឹកនាំដោយគ្រូបង្វឹកសញ្ជាតិកូរ៉េខាងត្បូង Park Hang-seo នឹងត្រូវប៉ះក្រុម U-23 កូរ៉េខាងត្បូង នាវគ្គពាក់កណ្ដាលផ្ដាច់ព្រ័ត្រ Asian Games នាម៉ោង ៤រសៀល ថ្ងៃទី២៩ ខែសីហានេះ។ អ្វីដែលគួរឲ្យកត់សម្គាល់ គឺលោក Park គឺជាមិត្តភក្ដិជិតស្និទ្ធជាមួយលោក Kim Hak-beom គ្រូបង្វឹក U-23 កូរ៉េខាងត្បូងថែមទៀតផង។

មុនការប្រកួតមកដល់ លោក Park បានថ្លែងប្រាប់សារព័ត៌មានវៀតណាមថា៖

"យើងទាំង២នាក់គឺជាមិត្តភក្ដិជិតស្និទ្ធនឹងគ្នា។ ក្រុមទាំង២ ក៏បានស្នាក់នៅសណ្ឋាគារដូចគ្នាដែរ ដូច្នេះពួកគេបានជួបគ្នាជាញឹកញាប់។ លោក Kim (គ្របង្វឹកកូរ៉េខាងត្បូង) គឺជាគ្រូបង្វឹកដែលមានបច្ចេកទេសបង្វឹកខ្ពស់ រហូតដល់គេហៅលោកថាជា Alex Ferguson នៃ K-League ថែមទៀតផង។ កាលនៅបង្វឹកក្រុមនៅ K-League (លីគកំពូលកូរ៉េ) ពួកយើងបានតទល់គ្នាជាច្រើនលើក។ យើងនឹងព្យាយាមលេងឲ្យបានទាក់ទាញ ក្នុងវគ្គពាក់កណ្ដាលផ្ដាច់ព្រ័ត្រ"។

លោក Park Hang-seo គ្រូបង្វឹកក្រុម U-23 វៀតណាម (រូបភាព៖ thanhnien)

លោក Park បានបញ្ជាក់ទៀតថា លោកគាំទ្រកូរ៉េខាងត្បូង ប៉ុន្តែលើកនេះ លោកនឹងជួយវៀតណាម ឲ្យឡើងទៅកាន់វគ្គផ្ដាច់ព្រ័ត្រ។ "ខ្ញុំរីករាយរហូតស្រក់ទឹកភ្នែកពេលកូរ៉េខាងត្បូង ឈ្នះអ៊ូបេគីស្ថាន កាលពីវគ្គ ៨ក្រុម។ គ្រប់គ្នាដឹងហើយ ថាខ្ញុំស្រលាញ់ប្រទេសជាតិរបស់ខ្ញុំប៉ុណ្ណា។ ប៉ុន្តែពេលនេះ ខ្ញុំជាគ្រូបង្វឹកក្រុមវៀតណាម។ ទំនួលខុសត្រូវរបស់ខ្ញុំ គឺធ្វើយ៉ាងណាឲ្យក្រុមទទួលជ័យជម្នះ។ ខ្ញុំនឹងព្យាយាមឲ្យអស់សមត្ថភាព និងត្រៀមខ្លួនឲ្យបានរួចរាល់ ដើម្បីជួយវៀតណាមក្នុងវគ្គ ៤ក្រុមនេះ។ យើងចង់ឈ្នះកូរ៉េខាងត្បូង ដើម្បីឡើងទៅកាន់វគ្គផ្ដាច់ព្រ័ត្រ"។

លោក Kim Hak-beom គ្រូបង្វឹកក្រុម U-23 កូរ៉េខាងត្បូង (រូបភាព៖ Yonhap News)

គួររំលឹកផងដែរថា លោក Park ធ្លាប់រួមចំណែកជួយកូរ៉េខាងត្បូង ឡើងដល់វគ្គពាក់កណ្ដាលផ្ដាច់ព្រ័ត្រ FIFA World Cup ឆ្នាំ២០០២ ក្នុងនាមលោកជាជំនួយការលោក Guss Hiddink។ លោកបានចូលដឹកនាំក្រុមជម្រើសជាតិវៀតណាម (ទាំងក្រុមធំ ទាំងក្រុម U-23) កាលពីឆ្នាំ ២០១៧ កន្លងទៅ។ កាលពីដើមឆ្នាំ ២០១៨ លោកបានជួយក្រុម U-23 វៀតណាម ឡើងដល់វគ្គផ្ដាច់ព្រ័ត្រពានរង្វាន់ AFC U-23 ជាប្រវត្តិសាស្រ្ដ (ទទួលបានចំណាត់ថ្នាក់លេខ២ ក្រោយចាញ់អ៊ូបេគីស្ថាន ២-១ ក្នុងម៉ោងបន្ថែម)៕

សូមបញ្ជាក់ថា មុនឡើងមកប៉ះគ្នានៅវគ្គ ៤ក្រុមចុងក្រោយ ក្រុម U-23 វៀតណាម បានយកឈ្នះក្រុម U-23 ស៊ីរី ១-០ ខណៈក្រុម U-23 កូរ៉េខាងត្បូង បានយកឈ្នះអ៊ូបេគេស្ថាន ៤-៣ (ក្រោយម៉ោងបន្ថែម)។ ក្រុមឈ្នះ នឹងឡើងទៅវគ្គផ្ដាច់ព្រ័ត្រ ដោយត្រូវប៉ះជប៉ុន ឬ អារ៉ាប់រួម នាថ្ងៃទី១ ខែកញ្ញា ឆ្នាំ២០១៨៕