សម្ដេច ហ៊ុន សែន បកស្រាយរឿងការរួចទោស និងបញ្ជាឲ្យមេធាវីតាមទារលុយ ៨០០លានរៀល

2018-08-29 02:29:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេច ហ៊ុន សែន បានលើកឡើងថា ការរួចទោសនាពេលថ្មីៗកន្លងមកនេះ មាន ២ប្រភេទ គឺការរួចទោសតាមរយៈការស្នើសុំមកសម្ដេចនាយករដ្ឋមន្រ្តី ដើម្បីទូលថ្វាយព្រះមហាក្សត្រលើកលែងទោស និងការរួចទោសតាមរយៈការផុតរលត់នៃទោស។

សម្ដេច ហ៊ុន សែន ថ្លែងអំឡុងជួបជាមួយថ្នាក់ដឹកនាំគណបក្សនយោបាយ នៅវិមានសន្ដិភាព

សម្ដេចនាយករដ្ឋមន្រ្ដី បានលើកឡើងយ៉ាងដូច្នេះ នៅក្នុងពិធីជួបសំណេះសំណាល ជាមួយកម្មករ កម្មការិនីជាង ១ម៉ឺន៤ពាន់នាក់ ក្នុងខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៩ ខែសីហានេះ។

សម្ដេចតេជោថា ការរួចទោសតាមរយៈការស្នើសុំមកសម្ដេចនាយករដ្ឋមន្រ្តី ដើម្បីទូលថ្វាយព្រះមហាក្សត្រលើកលែងទោស គឺមិនចាំបាច់បង់សំណងនោះទេ។ ប៉ុន្ដែអ្នករួចទោសតាមរយៈការផុតរលត់នៃទោស កាលពីពេលថ្មីៗនេះ ត្រូវបង់ប្រាក់សំណង។ ក្នុងនោះ សម្ដេច ហ៊ុន សែន បានបញ្ជាឲ្យមេធាវីគណបក្សប្រជាជនកម្ពុជា តាមទារលុយ ៨០០លានរៀល។

សម្ដេច ហ៊ុន សែន បញ្ជាក់ថា អ្នករួចទោសតាមរយៈការស្នើសុំមកសម្ដេចនាយករដ្ឋមន្រ្តី ដើម្បីទូលថ្វាយព្រះមហាក្សត្រលើកលែងទោស មានដូចជាលោក អ៊ុំ សំអាន លោក មាជ សុវណ្ណារ៉ា អ្នកស្រី ទេព វន្នី និងសកម្មជនមួយចំនួនទៀត។

លោក មាជ សុវណ្ណារ៉ា និងសកម្មជន ១៣នាក់ ដែលត្រូវបានព្រះមហាក្សត្រលើកលែងទោស កាលពីពេលថ្មីៗកន្លងទៅ

ចំណែកលោក គឹម សុខ បានរួចទោស និងត្រូវបានដោះលែងចេញពីពន្ធនាគារ បន្ទាប់ពីលោកអនុវត្តទោសរយៈពេល ១ឆ្នាំកន្លះ គិតត្រឹមថ្ងៃទី១៧ ខែសីហា នេះ។

លោក គឹម សុខ បានរួចទោស និងត្រូវបានដោះលែងពីពន្ធនាគារ បន្ទាប់ពីលោកអនុវត្តទោសរយៈពេល ១ឆ្នាំកន្លះ

សូមបញ្ជាក់ថា តុលាការបានសម្រេចផ្តន្ទាទោសលោក គឹម សុខ អ្នកវិភាគសង្គម ដាក់ពន្ធនាគាររយៈពេល ១៨ខែ និងពិន័យជាប្រាក់ ៨លានរៀលចូលថវិការដ្ឋ និងសងជំងឺចិត្ត ៨០០លានរៀល ដល់គណបក្សប្រជាជនកម្ពុជា ពាក់ព័ន្ធនឹងការចោទប្រកាន់ថា គណបក្សប្រជាជនកម្ពុជា រៀបចំផែនការសម្លាប់លោក កែម ឡី។ ការសម្រេចនេះ បានធ្វើឡើងកាលពីរសៀលថ្ងៃទី១០ ខែសីហា ឆ្នាំ២០១៧៕

អត្ថបទ៖ វាសនា