លោក ហ៊ុន ម៉ានី តំណាងរាស្រ្ត​មណ្ឌលខេត្ត​កំពង់ស្ពឺ នៅព្រឹក​ថ្ងៃទី៦ កញ្ញា​នេះ ត្រូវបាន​សមាជិក​រដ្ឋសភា បោះឆ្នោត​ជ្រើសរើស​ឱ្យធ្វើជា​ប្រធាន​គណៈកម្មការ​ទី៧ នៃ​រដ្ឋសភា​នីតិកាល​ទី៦ (គណៈកម្មការ​អប់រំ យុវជន កីឡា ធម្មការ កិច្ចការសាសនា វប្បធម៌ និង​ទេសចរណ៍)។ ចំណែក​អនុ​ប្រធាន​​នៃគណៈកម្មការនេះ គឺ លោកស្រី ឯម ប៉ុណ្ណា។

ចំណែក​លោក ប៉ា សុជាតិវង្ស តំណាងរាស្រ្ត​មណ្ឌល​រាជធានី​ភ្នំពេញ ត្រូវបាន​ជ្រើសរើស​ជាប្រធាន​កម្មការ​ទី១ នៃ​រដ្ឋសភា (គណៈកម្មការ​សិទ្ធិមនុស្ស ទទួលពាក្យ​បណ្តឹង អង្កេត និង​ទំនាក់ទំនង​រដ្ឋសភា ព្រឹទ្ធសភា)។ ចំណែក​អនុ​ប្រធាន​​នៃគណៈកម្មការនេះ គឺលោកស្រី បាន ស្រីមុំ។

ក្រៅពីនេះ ប្រធាន​គណៈកម្មការ​ចំនួន ៨ទៀត​រួមមាន៖

• លោក ជាម យៀប ប្រធាន​គណៈកម្មការ​ទី២ (គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម)។ លោក ឡូយ សុផាត ជាអនុប្រធាន។

• លោក ជា វណ្ណដេត ប្រធាន​គណៈកម្មការ​ទី៣ (គណៈកម្មការ​ផែនការ វិនិយោគ កសិកម្ម អភិវឌ្ឍន៍​ជនបទ បរិស្ថាន និង​ធនធានទឹក)។ លោក ហ៊ូ ស្រ៊ី ជាអនុប្រធាន។

• លោក ហ៊ុន ណេង ប្រធានគណៈកម្មការទី៤ (គណៈកម្មការ​មហាផ្ទៃ ការពារ​ជាតិ និង​មុខងារ​សាធារណៈ)។ លោក ប្រាជ្ញ ចន្ទ ជាអនុប្រធាន។

• លោក ឈាង វុន ប្រធានគណៈកម្មការទី៥ (គណៈកម្មការ​កិច្ចការ​បរទេស សហប្រតិបត្តិការ​អន្តរជាតិ ឃោសនាការ និង​ព័ត៌មាន)។ លោក សួស យ៉ារ៉ា ជាអនុប្រធាន។

• លោក ប៉ែន បញ្ញា ប្រធានគណៈកម្មការទី៦ (គណៈកម្មការ​នីតិកម្ម និង​យុត្តិធម៌)។ លោក គ្រួច សំអាន ជាអនុប្រធាន។

• លោកស្រី ឡោក ខេង ប្រធានគណៈកម្មការទី៨ (គណៈកម្មការ​សុខាភិបាល សង្គម​កិច្ច អតីតយុទ្ធជន យុវនីតិ​សម្បទា ការងារ បណ្តុះបណ្តាល​វិជ្ជាជីវៈ និងកិច្ចការនារី។ លោក ប៉ាល់ សំអឿន ជាអនុប្រធាន។

• លោកស្រី និន សុផុន ប្រធានគណៈកម្មការទី៩ (គណៈកម្មការ​សាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំ​ដែនដីនគរូបនីយកម្ម និង​សំណង់)។ លោក សុខ សូកាន ជាអនុប្រធាន។

• លោក ប៉ែន ស៊ីម៉ន ប្រធាន​គណៈកម្មការទី១០ (គណៈកម្មការអង្កេត បោសសម្អាត និង​ប្រឆាំង​អំពើពុករលួយ)។ លោក ត្រឹង ថាវី ជាអនុប្រធាន។

សូម​បញ្ជាក់​​ផងដែរថា ប្រធាន​រដ្ឋសភា​នីតិកាល​ទី៦​នេះ គឺ​សម្តេច ហេង សំរិន។ អនុប្រធាន​ទី១ លោក ងួន ញ៉ិល និង​អនុ​ប្រធានទី២ គឺ​លោកស្រី ឃួន សុដារី៕

អត្ថបទទាក់ទង៖

• សមាសភាព​ទេសរដ្ឋមន្ត្រី​ទាំង​១៧​រូប សម្រាប់​រដ្ឋាភិបាល​អាណត្តិ​ទី​៦

• រដ្ឋមន្ត្រី​ចំនួន​៣​រូប ត្រូវបាន​ដំឡើង​តួនាទី​ជា​ឧប​នាយករដ្ឋមន្ត្រី