ក្រុមសហជីព គ្រោងទាមទារប្រាក់ខែគោលកម្មករ ចំនួន៤ជម្រើស

2018-09-08 09:19:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការចរចាប្រាក់ឈ្នួលអប្បបរមាកម្មករ ផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំថ្មី ឆ្នាំ២០១៩នឹងចាប់ផ្តើម នៅថ្ងៃច័ន្ទសប្តាហ៍ក្រោយ ដោយមានការចូលរួម ពីត្រីភាគី រួមមានតំណាងរដ្ឋាភិបាល និយោជក និងសហជីព។ ក្រោយប្រជុំពិភាក្សាកាលពីថ្ងៃទី០៦ កញ្ញា កន្លងទៅនេះ ក្រុមសហជីពគ្រោងនឹងទាមទារប្រាក់ខែគោលកម្មករ ពីភាគីនិយោជក ចំនួន៤ជម្រើស។ ទី១ គឺ១៩២,៦៧ដុល្លារ ទី២ គឺ២១១,៩៤ដុល្លារ ទី៣គឺ ២២១,០១៣ដុល្លារ និងទី៤គឺ ២៨៦ដុល្លារ។

សម្រាប់តួលេខ ស្ថិតនៅកម្រិតមធ្យម ក្នុងចំណោមតួលេខទាំង៤ខាងលើ ដែលនឹងត្រូវដាក់សម្រាប់ចរចា គឺ ២១១,៩៤ដុល្លារ។ នេះបើតាមការបញ្ជាក់ពីលោក អាត់ ធន់ ប្រធានសហភាពការងារកម្ពុជា។

កម្មការិនី នៅរោងចក្រមួយកន្លែងក្នុងរាជធានីភ្នំពេញ

លោក អាត់ ធន់ បានបញ្ជាក់ថា ការសម្រេចជ្រើសរើសតួលេខ ប្រាក់ខែកម្មករខាងលើនេះ ដោយផ្អែកលើលក្ខណៈវិនិច្ឆ័យចំនួន៧ ក្នុងនោះរួមមាន ស្ថានភាពគ្រួសារ ការចំណាយក្នុងការរស់នៅ អតិផរណា ផលិតភាពពលកម្ម ភាពប្រកួតប្រជែងរបស់ប្រទេស ស្ថានភាពទីផ្សារការងារ និងភាពចំណេញវិស័យ។

លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរកម្ពុជា ប្រាប់ថា តួលេខដែលសហជីពស្នើឡើងពុំសូវមានភាពជាក់ស្ដែង បើធៀបទៅនឹងស្ថានភាពសេដ្ឋកិច្ចនៅកម្ពុជា។ លោកបន្តថា ប្រាក់ឈ្នួលកម្មករឆ្នាំ២០១៨ មានចំនួន ១៧០ដុល្លារ ហើយឆ្នាំ២០១៩ ឡើងដល់ ២១១,៩៤ដុល្លារ គឺមិនអាចទៅរួចនោះទេ។ មិនអាចទៅរួច ដោយសារ ប្រាក់ឈ្នួល២១១,៩៤ដុល្លារនេះ គឺខ្ពស់ជាងប្រទេស ដែលមានសេដ្ឋកិច្ចខ្លាំងជាងកម្ពុជា ពិសេសប្រទេសវៀតណាម។

ក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា កិច្ចប្រជុំចរចាប្រាក់ខែគោលកម្មករ នឹងធ្វើឡើងជាដំណាក់កាល ដោយចាប់ផ្តើមពីថ្ងៃទី១០ កញ្ញា និងបញ្ចប់នៅដើមខែតុលា ដែលមានសមាសភាពមកពីតំណាងរដ្ឋាភិបាលចំនួន១៦រូប សហជីព១៦រូប និងនិយោជក១៦រូប៕

ប្រភព៖ Radio Free Asia ប្រែសម្រួល៖ លាភ.