សម្តេច ហ៊ុន សែន ផ្តល់អនុសាសន៍៤ចំណុចឱ្យអាស៊ាន ក្នុងវេទិកាសេដ្ឋកិច្ចពិភពលោក
- 2018-09-12 09:22:20
- ចំនួនមតិ 0 | ចំនួនចែករំលែក 0
សម្តេច ហ៊ុន សែន ផ្តល់អនុសាសន៍៤ចំណុចឱ្យអាស៊ាន ក្នុងវេទិកាសេដ្ឋកិច្ចពិភពលោក
ចន្លោះមិនឃើញ
ក្នុងវេទិកាសេដ្ឋកិច្ចពិភពលោកស្តីពីអាស៊ានលើកទី២៧ ដែលធ្វើឡើងនៅក្រុងហាណូយ ប្រទេសវៀតណាម នាថ្ងៃទី១២កញ្ញានេះ សម្តេចនាយករដ្ឋមន្រ្តី ហ៊ុន សែន បានផ្តល់អនុសាសន៍ថា អាស៊ានគួរតែអនុវត្តនូវវិធានការណ៍ចំនួន៤ ដើម្បីចាប់យកនូវការអភិវឌ្ឍជាវិជ្ជមាន។ ៤ចំណុចនោះរួមមាន៖
១. បង្កើតនូវចក្ខុវិស័យអាស៊ានរួមមួយអំពីឧស្សាហកម្ម ៤.០ (ASEAN Vision for Industry 4.0) ដែលមានលក្ខណៈគ្រប់ជ្រុងជ្រោយ និងបរិយាប័ន្ន ដោយផ្អែកលើគំនិតផ្តួចផ្តើមរបស់អាស៊ាន ដែលមានស្រាប់ ព្រមទាំងរួមបញ្ចូលកម្មវិធីអភិវឌ្ឍន៍សំខាន់ៗ លើផ្នែកបច្ចេកវិទ្យា ការអភិវឌ្ឍធនធានមនុស្ស ក្របខណ្ឌគតិយុត្តិ ហេដ្ឋារចនាសម្ព័ន្ធផ្នែកទន់ និងរឹងរបស់បច្ចេកវិទ្យាព័ត៌មាន និងកម្មវិធីកែទម្រង់របស់អាស៊ាន និងប្រទេសជាសមាជិកនីមួយៗផងដែរ។
២. រៀបចំកម្មវិធីរួមពង្រឹងសមត្ថភាពមនុស្ស តាមរយៈការលើកកម្ពស់គុណភាពនៃការអប់រំ ការបណ្តុះបណ្តាលជំនាញការដោះស្រាយបញ្ហាបាត់បង់ការងារ ការរៀបចំប្រព័ន្ធគាំពារសង្គម ដើម្បីដោះស្រាយបញ្ហាវិសមភាពសេដ្ឋកិច្ច និងសង្គម។
៣. លើកកម្ពស់ការរៀបចំជាប្រព័ន្ធអេកូឡូហ្សី ដែលគាំទ្រការស្រាវជ្រាវ និងនវានុវត្តន៍ក្នុងតំបន់ ពង្រឹងនូវសមត្ថភាពសហគ្រិនភាព ក្នុងការរៀបចំម៉ូឌែលធុរកិច្ច បង្កើតការងារថ្មី និងតម្រង់ទិសថ្មីរបស់សេដ្ឋកិច្ចនាពេលអនាគត។
៤. បន្តកែលម្អហេដ្ឋារចនាសម្ព័ន្ធទាំងផ្នែករឹង និងទន់ ជាពិសេសបង្កើនការតភ្ជាប់ដែលមានស្រាប់ ក៏ដូចជាការបន្តធ្វើសមាហរណកម្មទាំងក្នុងតំបន់ និងអន្តរតំបន់ ដើម្បីបន្តកសាងមូលដ្ឋានគ្រឹះរឹងមាំ សម្រាប់ប្រជាជាតិអាស៊ាន ដើម្បីទាញយកផលប្រយោជន៍ពីស្ថានភាពកំណើនថ្មីក្នុងពិភពលោកនេះ។
បើតាមការថ្លែងសុន្ទរកថារបស់សម្តេច ហ៊ុន សែន ក្នុងវេទិកានេះ ឱ្យដឹងថា បដិវត្តន៍ឧស្សាហកម្មទី៤ កំពុងបង្ហាញពីការរីកចម្រើននៃបច្ចេកវិទ្យានៅក្នុងពិភពលោក ដែលជះឥទ្ធិពលយ៉ាងខ្លាំងលើការកំណត់ឡើងវិញនូវកត្តាផលិតកម្ម ទំនាក់ទំនងផលិតកម្ម ឥរិយាបថការប្រើប្រាស់ និងរចនាសម្ព័ន្ធសេដ្ឋកិច្ចដូចជា ការប្រើប្រាស់បច្ចេកវិទ្យាបញ្ញាសិប្បនិមិត្ត (AI), ការប្រើប្រាស់មនុស្សយន្ត (Robot), ការបោះពុម្ព 3D, ការប្រើប្រាស់បច្ចេកទេសជីវវិទ្យា (Biotech)។ បច្ចេកវិទ្យាទាំងនេះ បានធ្វើឱ្យមានការផ្លាស់ប្តូរយ៉ាងលឿនក្នុងល្បឿនមួយដែលមិនធ្លាប់មានពីមុនមកក្នុងវិស័យផលិតកម្ម អប់រំ សុខាភិបាល ទីផ្សារការងារ ពាណិជ្ជកម្ម ធុរកិច្ច រដ្ឋបាលសាធារណៈ និងបច្ចេកវិទ្យា៕
អត្ថបទទាក់ទង៖ សម្តេច ហ៊ុន សែន នឹងចូលរួមក្នុងវេទិកាសេដ្ឋកិច្ចពិភពលោក នៅវៀតណាម