រមណីយដ្ឋានទឹកធ្លាក់៧ជាន់ជ្រាវ កំពុងស្រូបទាញទេសចរកាន់តែច្រើន

2018-09-13 06:49:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថិតនៅចម្ងាយប្រមាណ៦០គីឡូម៉ែត្រពីក្រុងច្បារមន ទីរួមខេត្តកំពង់ស្ពឺ ទឹកធ្លាក់ជ្រាវជារមណីយដ្ឋានបែបធម្មជាតិ ដែលមានទឹកធ្លាក់រហូតដល់៧ជាន់ ហើយមានជម្រាលច្រើនដំណាក់អំណោយផលដល់ការងូតទឹកកម្សាន្តលេងពីសំណាក់ភ្ញៀវទេសចរជាតិ និងអន្តរជាតិ។

ទឹកធ្លាក់ជ្រាវស្ថិតនៅក្នុងភូមិតាំសំរោង ឃុំអមលាំង ស្រុកថ្ពង ខេត្តកំពង់ស្ពឺ ហើយវាជាទីកម្សាន្តគាប់ចិត្តរបស់ភ្ញៀវទេសចរដែលមិនប្រាថ្នាដើរផ្សងព្រេង លើវិថីវែងឆ្ងាយគឺគ្រាន់តែចតយានជំនិះភ្លាមបោះជំហានប្រមាណជាមួយរយម៉ែត្រ លោកអ្នកនឹងទៅដល់ទឹកធ្លាក់ដំណាក់ទី១ ដែលមានជម្រាលទឹកហូរសម្រាប់ងូតលេងកម្សាន្ត។ ដោយឡែកនៅដំណាក់ទឹកធ្លាក់ទី២ ភ្ញៀវទេសចរអាចងូតទឹក ហូបចុកចំណីអាហារថ្ងៃត្រង់ក្រោមម្លប់ដើមឈើ ឬក្បែរល្បាក់ទឹកធ្លាក់។ ដំណាក់ទី២នេះមានជម្រាល៣គន្លាក់ ចម្ងាយប្រមាណ៣០ម៉ែត្រពីដំណាក់ទី១។ ប៉ុន្តែជាទម្លាប់ ភ្ញៀវទេសចរក្នុងស្រុកភាគច្រើនចូលចិត្តនាំគ្នាងូតទឹក និងហែលលេងនៅខ្សែទឹកខាងលើ ដោយហេតុថា អ្នកលេងកម្សាន្តខ្សែទឹកខាងក្រោមអាចរងគ្រោះដោយសារសំណល់សំរាមផ្សេងៗ។

ចំណែកឯទឹកធ្លាក់ដំណាក់ទី៣ដល់ដំណាក់ទី៧ ស្ថិតនៅឆ្ងាយដែលភ្ញៀវទេសចរត្រូវចំណាយពេលដើរឡើងភ្នំរាប់ម៉ោង ភ្ញៀវទេសចរភាគច្រើនមិនចង់បន្តដំណើរទៀតនោះទេ។ បើទោះបីជាអ្នកភូមិអះអាងថា នៅដំណាក់បន្ទាប់មានទឹកធ្លាក់កម្ពស់រហូតដល់ជាង៣០ម៉ែត្រ ហើយមានទេសភាពស្រស់ស្អាតយ៉ាងណាក៏ដោយ ក៏មានមនុស្សតិចតួចណាស់តស៊ូស្រឡាញ់បរិស្ថានស្ងប់ស្ងាត់ បន្តដំណើរដល់ដំណាក់ទី៧ជាទីស្ថានលាក់ខ្លួនក្នុងធម្មជាតិ។

លោក សុខ សុភា អភិបាលរងខេត្តកំពង់ស្ពឺ បានប្រាប់ទីភ្នាក់ងារសារព័ត៌មានកម្ពុជា AKP ឱ្យដឹងនៅថ្ងៃទី១២ ខែកញ្ញា ឆ្នាំ២០១៨ថា ទឹកធ្លាក់៧ជាន់ជ្រាវ ជាតំបន់ទេសចរណ៍បែបធម្មជាតិពិតៗ និងជាតំបន់បែបទាក់ទាញដែលខេត្តកំពុងអភិវឌ្ឍ ដើម្បីប្រែក្លាយតំបន់នេះឱ្យទៅជាតំបន់អេកូទេសចរណ៍នាថ្ងៃអនាគត។ លោកបានបន្តថា កិច្ចសហការគ្នា លើកកម្ពស់វិស័យទេសចរណ៍ក្នុងស្រុកមានប្រយោជន៍ច្រើន ដូចជា ជួយកាត់បន្ថយក្នុងការធ្វើដំណើររបស់ប្រជាពលរដ្ឋទៅលេងស្រុកគេ ដែលនាំឱ្យខាតបង់ថវិកា និងធ្វើឱ្យប្រជាពលរដ្ឋក្នុងតំបន់ ក្នុងសហគមន៍អេកូទេសចរណ៍មានប្រាក់ចំណូលបង្កើនជីវភាពគ្រួសារបានប្រសើរ៕

ប្រភព៖ AKP ប្រែសម្រួល៖ ឈាង.