«បំណុលឈាមឪពុក» ភាពយន្តខ្មែរ ដែលមានឥទ្ធិពលបំផុតនៅប្រទេសថៃ
- 2018-09-18 04:30:49
- ចំនួនមតិ 0 | ចំនួនចែករំលែក 0
«បំណុលឈាមឪពុក» ភាពយន្តខ្មែរ ដែលមានឥទ្ធិពលបំផុតនៅប្រទេសថៃ
ចន្លោះមិនឃើញ
អំឡុងដើមទសវត្សឆ្នាំ ១៩៧០ ភាពយន្តខ្មែរមានសន្ទុះខ្លាំង រហូតមានឥទ្ធិពលដល់ប្រទេសជិតខាង ដូចជាប្រទេសថៃ ជាដើម។ តាមការស្រាវជ្រាវរបស់ក្រុមព្រះសុរិយា បានឲ្យដឹងថា ខ្សែភាពយន្តខ្មែរដែលទទួលបានការគាំទ្រយ៉ាងខ្លាំង ពីសំណាក់ប្រជាជនថៃ គឺរឿង «បំណុលឈាមឪពុក»។
និយាយពីលក្ខណៈពិសេសនៃភាពយន្តនេះវិញ តំណាងក្រុមព្រះសុរិយា លោក ឆោម វិរៈ លើកឡើងថា៖ «ភាពយន្តនេះមានលក្ខណៈពិសេសច្រើន គឺជាភាពយន្តបុរាណបែបផ្សងព្រង ក្រោមស្នាដៃនិពន្ធ និងដឹកនាំរឿងដោយលោក ឡុង ស៊ីដេត»។ ក្នុងនោះក៏ទទួលបានការជួយជ្រោមជ្រែងពីព្រះអង្គម្ចាស់ក្សត្រីស៊ីសុវត្ថិសាម៉ន ម៉េត ផងដែរ។
រឿង «បំណុលឈាមឪពុក» សម្ដែងដោយកំពូលតារាភាពយន្តដ៏ល្បីល្បាញនៃកម្ពុជា មាន លោក ជា យុទ្ធថន និង លោក គង់ សំអឿន បានសម្តែងរួមគ្នា ជាលើកទី២ បន្ទាប់ពីអ្នកទាំងពីរបានជួបគ្នាម្តង ក្នុងរឿង «ស្រមោលអតីតកាល»។ បន្ថែមលើនេះ អ្នកស្រី ទិត្យ វិជ្ជរ៉ាដានី និង ភួង ផាវី ក៏បានសម្តែងរួមគ្នា រួមទាំងតារាល្បីជាច្រើនទៀត ដូចជា លោក ឱ ឌុំ លោក ប៉ិច សាលឿន នាយ ត្រង់ដឺ ឡូ តូ ជាដើម។
ភាពយន្តនេះបានដាក់បញ្ចាំងជាផ្លូវការនៅរោងភាពយន្ត អេមផាអឺ ប្រទេសថៃ នៅថ្ងៃទី២៦ ខែឧសភា ឆ្នាំ១៩៧១ ដោយមានពិធីសម្ពោធដ៏ធំមួយ ដែលមានការចូលរួមពីវង់តន្រ្តីល្បីៗជាច្រើនវង់ប្រចាំរាជធានីបាងកក។ កាលណោះត្បិតតារាភាពយន្តខ្មែរ ពុំបានទៅចូលរួមសម្ពោធក៏ពិតមែន តែ លោក ឡុង ស៊ីដេត ជាអ្នកដឹកនាំរឿងខ្មែរ បានទៅចូលរួមជាតំណាងដ៏មានកិត្តិយសរបស់ប្រទេសកម្ពុជា។
ភាពយន្តនេះផងដែរ ក៏មានការចូលរួមសម្ដែងដោយតួស្រីខ្មែរម្នាក់ទៀត គឺ អ្នកស្រី សេង បុទុម។ អ្នកស្រី បានសម្តែងឈុតឆាកសិចស៊ី រហូតដល់ប្រជាជនថៃសរសើរ និងប្រៀបធៀបជាមួយតួសិចស៊ីប្រចាំប្រទេសថៃ គឺនាង មេតារ៉ុងរ៉ាត់។ នេះបើតាមឲ្យដឹងពីលោក ឆោម វីរៈ។
ខ្សែភាពយន្ត «បំណុលឈាមឪពុក» នេះ មានចម្រៀងចំនួនបីបទគឺ៖
បទ «ស្នេហាក្នុងពេលរាត្រី» ច្រៀងដោយលោក ស៊ីន ស៊ី សាមុត និងអ្នកស្រី រស់ សេរីសុទ្ធា
បទ «ជម្រកស្នេហ៍» ច្រៀងដោយលោក ស៊ីន ស៊ីសាមុត និងអ្នកស្រី ប៉ែន រ៉ន
បទ «បំណុលឈាមឪពុក» ច្រៀងដោយលោក ស៊ីន ស៊ីសាមុត លោក អ៊ិន យ៉េង អ្នកស្រី ប៉ែន រ៉ន និងអ្នកស្រី រស់ សេរីសុទ្ធា
ប្រភពរូបថត៖ ក្រុមព្រះសុរិយា