កីឡាការិនីកម្ពុជា យកឈ្នះជប៉ុន អាល្លឺម៉ង់ បន្តដំណើរដណ្ដើមជើងឯកប៊ីយ៉ាពិភពលោក

2018-09-19 12:56:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាការិនីស្នូកឃ័រ និងប៊ីយ៉ាឆ្នើមរបស់កម្ពុជា ស្រួង ភាវី បានកក់កៅអីវគ្គ ៨នាក់ចុងក្រោយ (វគ្គ ១/៤) នៃការប្រកួតកីឡាប៊ីយ៉ាជ្រើសរើសជើងឯកពិភពលោក 3-Cushion – World Championship Ladies លើកទី៨ នៅប្រទេសទួកគីហើយ បន្ទាប់ពីបានយកឈ្នះកីឡាការិនីជើងខ្លាំងជប៉ុន និងអាល្លឺម៉ង់ ក្នុងវគ្គជម្រុះពូល A កាលពីល្ងាចថ្ងៃទី១៨កញ្ញា ឆ្នាំ២០១៨។ នេះបើយោងតាមគណនីហ្វេសប៊ុកផ្លូវការរបស់ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ។

កីឡាការិនីស្នូកឃ័រ និងប៊ីយ៉ាឆ្នើមរបស់កម្ពុជា ស្រួង ភាវី (រូបថត៖ គណនីហ្វេសប៊ុកផ្លូវការរបស់ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ)

ការប្រកួតនេះបែងចែកជា ៤ពូល ហើយក្នុងមួយពូលមាន ៤នាក់ ខណៈកីឡាការិនីជម្រើសជាតិកម្ពុជា ស្រួង ភាវី ស្ថិតក្នុងពូល A ជាមួយគូប្រជែង ៣ប្រទេស រួមមានជប៉ុន អាល្លឺម៉ង់ និងដាណឺម៉ាក ។ ប៉ុន្ដែឆ្លងកាត់ ២ប្រកួតបើកឆាក ភាវី ធ្វើបានយ៉ាងល្អ ដោយទទួលបានជ័យជម្នះផ្ទួនៗ ក្នុងនោះប្រកួតទី១ ភាវី ឈ្នះកីឡាការិនីជប៉ុន Orie HIDA ដោយលទ្ធផល ២៥-២៤ពិន្ទុ និងប្រកួតទី២ យកឈ្នះកីឡាការិនីអាល្លឺម៉ង់ Steffi DASKE ដោយលទ្ធផល ២៥-១១ពិន្ទុ។

តាមរយៈជ័យជម្នះខាងលើ បានធ្វើឲ្យកីឡាការិនីតំណាងកម្ពុជារូបនេះ កក់កៅអីវគ្គ ១/៤ ផ្ដាច់ព្រ័ត្រតែម្ដង ទោះបីជានាងសល់ ១ប្រកួតក្នុងដៃ ដែលត្រូវជួបកីឡាការិនីដាណឺម៉ាក Jeanette JENSEN ក៏ដោយ។

សូមបញ្ជាក់ថា នេះគឺជាលើកទី១ ហើយ ដែលកីឡាការិនី ស្រួង ភាវី បានចូលរួមប្រកួតកីឡាប៊ីយ៉ាជ្រើសរើសជើងឯកពិភពលោក ក្នុងនាមជាកីឡាការិនីជម្រើសជាតិកម្ពុជា បន្ទាប់ពីកម្ពុជា បានបង្កើតឲ្យមានសហព័ន្ធកីឡាឃ្នូកឃ័រ និងប៊ីយ៉ាផ្លូវការកាលពីពេលថ្មីៗកន្លងទៅ។ ក៏ប៉ុន្ដែនេះមិនមែនជាលើកទី១ ដែល ភាវី បានចូលរួមក្នុងព្រឹត្តិការណ៍នេះឡើយ ពោលគឺ ភាវី ក៏ធ្លាប់ដណ្ដើមបានជើងឯករងម្ដងរួចមកហើយ កាលពីឆ្នាំ២០១៥ ក្នុងការប្រកួតជើងឯកពិភពលោក នៅអាមេរិក ក៏ដូចជាការដណ្ដើមជើងឯកពានរង្វាន់អន្ដរជាតិផ្សេងៗជាច្រើនទៀត៕

អត្ថបទ៖ លាភ.